जनकपुरधाम । लेखक सुरेशकुमार यादवद्वारा लिखित ‘स्टार वडाध्यक्ष’ पुस्तक विमोचन गरिएको छ। आइतबार जनकपुरधाममा मधेस प्रदेशका सभामुख रामआशिष यादवले पुस्तक विमोचन गर्नुभएको हो।

संघीयता सुदृढीकरण गर्ने उद्देश्यले लेखिएको पुस्तकमा मधेस प्रदेशका ५१ जना वडाध्यक्षले गरेका असल काम र उनीहरूको संघर्षका कथा समेटिएका छन्। पुस्तकमा दलित, महिला, आदिवासी जनजातिलगायत विभिन्न समुदायबाट निर्वाचित वडाध्यक्षका अनुभव समेटेर समावेशी स्वरूप दिइएको छ।

वीरेन्द्रकुमार यादव प्रकाशक रहेको पुस्तकको आवरणमा ‘समर्पण, सेवा र नेतृत्वका ५१ सूत्र’ भन्ने नारा राखिएको छ।

पुस्तकमा विभिन्न स्थानीय तहमा कार्यरत जनप्रतिनिधिको जीवन, संघर्ष र योगदानलाई केन्द्रमा राखिएको छ। सामान्य पारिवारिक तथा सामाजिक पृष्ठभूमिबाट आएका जनप्रतिनिधिले इमानदारी, पारदर्शिता र सामाजिक न्यायका माध्यमबाट नागरिकको विश्वास जित्न सफल भएका विषयलाई पुस्तकमा कथाका रूपमा प्रस्तुत गरिएको छ।

त्यस्तै, वडाध्यक्षहरूले आफ्नो क्षेत्रमा गरेका पूर्वाधार विकास, शिक्षा, स्वास्थ्य तथा कृषि क्षेत्रका सुधारका प्रयासलाई पनि पुस्तकमा विस्तृत रूपमा समेटिएको छ।

पुस्तकले राजनीतिलाई केवल सत्ता प्राप्तिको माध्यम नभई जनसेवा र सामाजिक रूपान्तरणको प्रभावकारी साधनका रूपमा चित्रण गरेको लेखकले बताएका छन्।

Originally published on abcnews.com.np.