काठमाडौं । विधायन व्यवस्थापन समितिको बैठकमा ‘संक्रामक पशु रोग (नियन्त्रण) विधेयक, २०८३’ माथि सैद्धान्तिक छलफल भएको छ।

समितिको बैठकमा कृषि, वन तथा पर्यावरणमन्त्री गीता चौधरीले विधेयकमाथि सांसद तथा सरोकारवालाबाट प्राप्त सुझावले कानुनलाई थप प्रभावकारी र व्यावहारिक बनाउन सहयोग पुग्ने बताइन्।

मन्त्री चौधरीले कानुन कार्यान्वयनका लागि विद्यमान संयन्त्रलाई प्रभावकारी रूपमा परिचालन गर्नुपर्ने बताइन्। मन्त्रालयले सरोकारवालासँग यस विधेयकसहित पशु स्वास्थ्य तथा अन्य सम्बन्धित कानुनका विषयमा समेत छलफल गरिरहेको जानकारी दिइन्।

विगतमा कानुन कार्यान्वयनका क्रममा विभिन्न कमजोरी देखिएको उल्लेख गर्दै मन्त्री चौधरीले आगामी दिनमा त्यस्ता समस्या दोहोरिन नदिने गरी विधेयकलाई प्रभावकारी बनाउनुपर्नेमा जोड दिइन्।

समितिबाट प्राप्त सुझावलाई विधेयकमा आवश्यक रूपमा समेट्न मन्त्रालय प्रतिबद्ध रहेको उनले बताइन्।

Originally published on abcnews.com.np.