काठमाडौं । वैदेशिक रोजगार क्षेत्रमा सक्रिय तीन जना व्यवसायीले आफू आबद्ध वैदेशिक रोजगारसम्बन्धी विभिन्न संघसंस्थाको सदस्यता त्यागेका छन्। मलेसियाको रोजगारीमा सिण्डिकेट गरेको आरोप र व्यवसायी संस्थाभित्र बढ्दो राजनीतिक हस्तक्षेप तथा गैरव्यवसायिक व्यवहारप्रति असन्तुष्टि जनाउँदै उनीहरूले राजीनामा दिएका हुन्।

वैदेशिक रोजगार व्यवसायी संघ तथा प्रगतिशील वैदेशिक रोजगार व्यवसायी मञ्चका विभिन्न तहमा जिम्मेवारी सम्हालिसकेका रघुनाथ पुरी, मिलन कट्टेल र रविन गुरुङले संस्थागत सदस्यता त्यागेको जानकारी दिएका छन्।

उनीहरूले वैदेशिक रोजगार व्यवसायबाहेक अन्य संगठनात्मक गतिविधिमा नरहने निर्णय गरेको बताएका छन्। संघसंस्थामा अनावश्यक राजनीतिक हस्तक्षेप र गैरव्यवसायिक आचरण बढ्दै गएको भन्दै उनीहरूले असन्तुष्टि व्यक्त गरेका छन्।

द रिभर ओभरसिजका रघुनाथ पुरी वैदेशिक रोजगार व्यवसायी संघ र प्रगतिशील वैदेशिक रोजगार व्यवसायी मञ्च दुवैका सल्लाहकारका रूपमा कार्यरत थिए। त्यस्तै, ट्रष्ट नेपालका रविन गुरुङ प्रगतिशील मञ्चका सल्लाहकार हुन् भने एसिया लिंकका मिलन कट्टेल प्रगतिशील मञ्चका पूर्वमहासचिव हुन्।

मञ्चले गर्‍यो निष्कासनको घोषणा

यसैबीच, प्रगतिशील वैदेशिक रोजगार व्यवसायी मञ्चले भने तीनै जनालाई संस्थाको साधारण सदस्यबाट निष्कासन गरिएको जनाएको छ।

मञ्चका अध्यक्ष जनक रावलले विज्ञप्ति जारी गर्दै रघुनाथ पुरी, मिलन कट्टेल र रविन गुरुङलाई संस्थाको विधानअनुसार कारबाही गरी साधारण सदस्य पदबाट निष्कासन गरिएको जानकारी दिएका हुन्।

तीन व्यवसायीले भने संघसंस्थाबाट स्वेच्छिक रूपमा अलग हुने निर्णय गरेको बताएका छन्। उनीहरूको सदस्यता त्यागको घोषणा र मञ्चले गरेको निष्कासनको निर्णयसँगै वैदेशिक रोजगार व्यवसायी क्षेत्रभित्रको विवाद थप सतहमा आएको छ।

Originally published on abcnews.com.np.