बागलुङ । नेपाल प्रहरीका महानिरीक्षक दानबहादुर कार्कीले प्रहरी सुरक्षित भए मात्रै नागरिकलाई उच्च मनोबलका साथ सुरक्षा प्रदान गर्न सकिने बताएका छन्। उनले प्रहरी र नागरिकबीचको सहकार्यबाट मात्रै सभ्य तथा अपराधरहित समाज निर्माण गर्न सकिने बताए।

जिल्ला प्रहरी कार्यालय बागलुङमा निर्माण सम्पन्न भएका चारवटा ब्यारेक तथा आवास भवनको उद्घाटन गर्दै महानिरीक्षक कार्कीले समुदायको अपनत्व र सहयोगबिना प्रहरी सफल हुन नसक्ने बताए। अपराध न्यूनीकरण तथा अनुसन्धानमा नागरिकको महत्वपूर्ण भूमिका रहने उनको भनाइ थियो।

दिनभर सुरक्षामा खटिने प्रहरीलाई आराम गर्ने कक्षको बागलुङ सदरमुकाममा अभाव रहेकामा नयाँ भवन निर्माण भएपछि सहज भएको उनले बताए। जिल्ला प्रहरी कार्यालय परिसरमा रु. ९ करोड ७१ लाखको लागतमा ब्यारेक, मेस, हिरासत कक्ष, वरिष्ठ प्रहरी अधिकृत आवास तथा कार्यालय प्रमुख निवास गरी चारवटा भवन निर्माण गरिएका छन्।

महानिरीक्षक कार्कीले नागरिक प्रहरी कार्यालयमा आउँदा आफ्नै घर सम्झेर विश्वासका साथ आउने वातावरण निर्माण गर्नुपर्नेमा जोड दिए। उनले बदलिँदो समयअनुसार प्रहरीलाई थप प्रविधिमैत्री र परिस्कृत बनाउन आवश्यक रहेको बताए।

उनका अनुसार नेपालभर २८५ वटा प्रहरी युनिट जोखिमपूर्ण अवस्थामा छन् भने थप ९७० प्रहरी युनिटको माग भइरहेको छ।

विसं २०७९ देखि निर्माण सुरु भएको जिल्ला प्रहरी कार्यालय बागलुङको भवन २०८३ जेठमा सम्पन्न भएको प्रहरी उपरीक्षक फडिन्द्र प्रसाईले जानकारी दिए। नयाँ भवन निर्माणसँगै प्रहरीले भाडाका भवनमा बस्नुपर्ने अवस्थाको अन्त्य भएको उनले बताए।

Originally published on abcnews.com.np.