काठमाडौं । त्रिवि शिक्षण अस्पतालको आकस्मिक कक्षमा उपचाररत रसुवाको टिमुरेका ३८ वर्षीय गिरीलाल बुढाथोकी शारीरिक चोटभन्दा गहिरो मानसिक पीडासँग जुधिरहेका छन्। बुधबार बिहान आएको विनाशकारी बाढीले उनका श्रीमती र चार सन्तानलाई बगाएपछि उनी एक्लिएका छन्।

गिरीलालका अनुसार बाढीले उनका १५ र १७ वर्षीया दुई छोरी तथा १० र १२ वर्षीय दुई छोरासहित श्रीमतीलाई बगाएको हो।

पाँच वर्षदेखि परिवारसहित टिमुरेमा बस्दै आएका गिरीलाल फोहोर बोक्ने गाडी चलाएर परिवारको गुजारा गर्दै आएका थिए। बुधबार बिहान करिब ९ बजे खाना खान घर फर्कंदै गर्दा माथिबाट अचानक ठूलो बाढी उर्लिएर आएको उनले बताए।

‘बाढी सिधै घरतिर आयो। म भाग्न खोजेँ, तर उहाँहरू भाग्न पाउनुभएन,’ आँसु झार्दै गिरीलालले भने, ‘बाढीले मेरा छोराछोरी र बुढीलाई बगायो। मेरो सबै सकियो, म एक्लै भएँ।’

बाढीले गिरीलाललाई समेत बगाएको थियो। तर नजिकै रहेको एउटा डण्डी समाउन पाएपछि उनी त्यसको सहारामा माथिल्लो स्थानसम्म पुग्न सफल भए। पछि मेसमा काम गर्ने साथीहरूले हेलिकोप्टर बोलाएपछि उनलाई उद्धार गरी त्रिवि शिक्षण अस्पताल ल्याइएको हो।

‘मलाई डण्डी भेटियो, त्यसैको सहारामा माथिसम्म आएँ। साथीहरूले हेलिकोप्टर बोलाए र मलाई यहाँ ल्याए,’ उनले भने, ‘म बाँचेँ, तर मेरा परिवारका सदस्य सबै गए।’

‘बाढी आएको थाहा नपाउँदै सबैलाई बगायो’

टाउको, हातखुट्टालगायत शरीरका विभिन्न भागमा चोट लागेका गिरीलालले बाढीले टिमुरे क्षेत्रमा ठूलो मानवीय क्षति पुर्‍याएको बताए।

‘धेरै मानिसले भाग्ने मौका नै पाएनन्। बाढी आएको थाहा नपाउँदै धेरैलाई बगाएर लग्यो,’ उनले भने।

त्रिवि शिक्षण अस्पतालका अनुसार समाचार तयार पार्दासम्म बाढीबाट घाइते भएका तीन महिनाको शिशुसहित १९ जनाको उपचार भइरहेको छ। तीमध्ये ७ जनालाई आइसियुमा राखिएको छ भने अन्य बिरामी आकस्मिक कक्षमा उपचाररत छन्।

अस्पतालका सूचना अधिकारी कालीप्रसाद रोस्याराका अनुसार अधिकांश घाइतेको शरीरका विभिन्न भागमा गम्भीर चोट लागेको छ। बाढीले बगाउँदा चट्टान, संरचना तथा अन्य वस्तुमा ठोक्किँदा पैतालादेखि टाउकोसम्म चोट लागेको अस्पतालले जनाएको छ।

विपद्बाट घाइतेको संख्या बढ्न सक्ने सम्भावनालाई ध्यानमा राख्दै त्रिवि शिक्षण अस्पतालले आपत्कालीन उपचार व्यवस्थापनलाई प्राथमिकता दिँदै आकस्मिक सेवा विस्तार गरेको जनाएको छ।

Originally published on abcnews.com.np.