काठमाडौं । रसुवाको भोटेकोसी नदीमा आएको बाढीबाट नेपालमा ठूलो जनधनको क्षति भएपछि बलिउड अभिनेता सोनु सुदले नेपालप्रति समर्थन जनाउँदै सहयोग गर्ने घोषणा गर्नुभएको छ।

अभिनेता सुदले बाढी प्रभावित नागरिकका लागि खाना, आश्रय र पुनर्निर्माणमा आवश्यक सहयोग उपलब्ध गराउने बताउनुभएको छ। उहाँले सामाजिक सञ्जाल फेसबुकमार्फत ‘नेपाल तिमी एक्लो छैनौ’ भन्दै विपद्को समयमा नेपालसँगै रहेको सन्देश दिनुभएको हो।

उहाँले लेख्नुभएको छ, ‘नेपाल तिमी एक्लो छैनौ। हामी खाना, आश्रय र पुनर्निर्माणका लागि आवश्यक साथ र सहयोग लिएर आउँदै छौँ।’

सोनु सुद यसअघि पनि विपद्का बेला मानवीय सहयोगका कारण चर्चामा आउनुभएको थियो। सन् २०२० मा कोरोना महामारीका कारण भारतमा लकडाउन हुँदा उहाँले नेपाल फर्किन चाहने नेपाली मजदुरका लागि निजी खर्चमा बस, रेल तथा विमानको व्यवस्था गर्नुभएको थियो।

त्यस क्रममा उहाँले मजदुरहरूलाई खाना तथा अन्य आवश्यक सामग्रीसमेत उपलब्ध गराउनुभएको थियो। विपद् र संकटमा परेकालाई सहयोग गर्दै आउनुभएका सुद भारतमा सामाजिक सेवाका लागि परिचित कलाकारका रूपमा समेत चिनिनुहुन्छ।

नेपालमा भोटेकोसी बाढीले ठूलो क्षति पुर्‍याइरहेका बेला सुदको सहयोग घोषणालाई मानवीय ऐक्यबद्धताको रूपमा हेरिएको छ।

Originally published on abcnews.com.np.