काठमाडौँ । जल तथा मौसम विज्ञान विभागअन्तर्गतको मौसम पूर्वानुमान महाशाखाले आज शुक्रबार दिउँसो र राति देशका विभिन्न स्थानमा मध्यमदेखि भारी वर्षाको सम्भावना रहेको जनाएको छ।

महाशाखाले बिहान ८ बजे जारी गरेको मौसम बुलेटिनअनुसार आज दिउँसो देशभर साधारणतया बादल लाग्नेछ। हिमाली भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ।

पहाडी भूभागका धेरै स्थानमा पनि मेघगर्जन र चट्याङसहित मध्यम वर्षा हुन सक्ने महाशाखाले जनाएको छ। बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थान तथा मधेस र कोसी प्रदेशका तराई भूभागका थोरै स्थानमा मध्यम वर्षाको सम्भावना छ।

महाशाखाका अनुसार कोसी, बागमती र गण्डकी प्रदेशका हिमाली तथा पहाडी भूभाग, कर्णाली र सुदूरपश्चिम प्रदेशका पहाडी भूभाग तथा लुम्बिनी प्रदेशका पहाडी र तराई भूभागका एक-दुई स्थानमा भारी वर्षा हुन सक्नेछ।

राति पनि वर्षाको सम्भावना

आज राति पनि देशभर साधारणतया बादल लाग्ने मौसम पूर्वानुमान गरिएको छ। कोसी, बागमती र गण्डकी प्रदेशका हिमाली तथा पहाडी भूभागका केही स्थानमा तथा लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका थोरै स्थानमा मेघगर्जन र चट्याङसहित मध्यम वर्षा वा हिमपात हुन सक्नेछ।

त्यस्तै, मधेस प्रदेश तथा कोसी र बागमती प्रदेशका तराई भूभागका केही स्थानमा वर्षाको सम्भावना छ। गण्डकी, लुम्बिनी र सुदूरपश्चिम प्रदेशका तराई भूभागका थोरै स्थानमा पनि मेघगर्जन र चट्याङसहित मध्यम वर्षा हुन सक्ने महाशाखाले जनाएको छ।

राति कोसी, बागमती र गण्डकी प्रदेशका हिमाली तथा पहाडी भूभागका एक-दुई स्थानमा भारी वर्षाको सम्भावना रहेको छ।

काठमाडौँ उपत्यकामा दिउँसोपछि वर्षा हुन सक्ने

आज काठमाडौँ उपत्यकासहित देशका विभिन्न स्थानमा वर्षा हुने सम्भावना रहेको छ।

मौसमविद् सञ्जीव अधिकारीका अनुसार काठमाडौँ उपत्यकामा दिउँसोबाट बादल बढ्दै जाने र अपराह्नपछि मध्यम वर्षा हुन सक्ने सम्भावना छ। उहाँका अनुसार रातिको समयमा पनि वर्षा हुन सक्नेछ।

“अहिले बिहान काठमाडौँ उपत्यकाको आकाशमा आंशिक बदली रहेको छ। दिउँसोबाट बादल बढ्दै जाने र २–३ बजेपछि मध्यम वर्षा हुन सक्छ। राति पनि वर्षाको सम्भावना छ,” उहाँले बताउनुभयो।

वर्षालाई कसरी वर्गीकरण गरिन्छ?

मौसमविद्का अनुसार २४ घण्टाभित्र १० मिलिमिटरभन्दा कम वर्षा भएमा त्यसलाई हल्का वर्षा मानिन्छ। १० मिलिमिटरभन्दा बढी तर ५० मिलिमिटरभन्दा कम वर्षा भएमा मध्यम वर्षा भनिन्छ।

त्यस्तै, ५० मिलिमिटरभन्दा बढी तर १०० मिलिमिटरभन्दा कम वर्षा भएमा भारी वर्षा, १०० मिलिमिटरभन्दा बढी तर २०० मिलिमिटरभन्दा कम वर्षा भएमा धेरै भारी वर्षा र २०० मिलिमिटरभन्दा बढी वर्षा भएमा अति भारी वर्षा मानिन्छ।

‘एक-दुई स्थान’ र ‘धेरै स्थान’ भन्नाले के बुझिन्छ?

मौसम पूर्वानुमानमा ‘एक-दुई स्थानमा वर्षा’ भनिएको अवस्थामा देशको सम्बन्धित भूभागको १० प्रतिशतभन्दा कम क्षेत्रमा वर्षा हुने सम्भावना जनाउँछ।

त्यस्तै, १० देखि ३० प्रतिशत भूभागमा वर्षाको सम्भावना भए थोरै स्थान, ३० देखि ५० प्रतिशत भूभागमा भए केही स्थान, ५० देखि ८० प्रतिशत भूभागमा भए धेरै स्थान र ८० प्रतिशतभन्दा बढी भूभागमा वर्षाको सम्भावना भए अधिकांश स्थानमा वर्षा हुने सम्भावना रहेको बुझिन्छ।

महाशाखाले मेघगर्जन, चट्याङ तथा भारी वर्षाको सम्भावना रहेका क्षेत्रमा आवश्यक सतर्कता अपनाउन सर्वसाधारणलाई आग्रह गरेको छ।

Originally published on abcnews.com.np.