सिन्धुपाल्चोक । भोटेकोसी नदीमा आएको बाढीका कारण अपर त्रिशूली–३ ‘ए’ जलविद्युत् आयोजनामा फसेकाहरूको उद्धारका लागि काठमाडौँबाट डेडिकेटेड हेलिकप्टर परिचालन गरिएको छ।

नेपाल विद्युत् प्राधिकरणका अनुसार टनेलभित्र रहेका व्यक्तिहरूको सुरक्षित उद्धारका लागि आवश्यक सामग्रीसहितको टोली हेलिकप्टरमार्फत प्रभावित क्षेत्रमा पठाइएको हो। प्राधिकरणले उद्धार कार्यलाई उच्च प्राथमिकताका साथ निरन्तरता दिइरहेको जनाएको छ। टनेलभित्र रहेका व्यक्तिहरूलाई धैर्य र संयम कायम राख्न आग्रह गर्दै प्राधिकरणले आधिकारिक सूचनामा मात्र विश्वास गर्न अनुरोध गरेको छ। यसअघि बिहीबारसम्म आयोजना क्षेत्रमा फसेका ३५० जना कर्मचारी, मजदुर तथा स्थानीयवासीको उद्धार गरिएको थियो। त्यसपछि थप २ जनाको उद्धार गरिएको प्राधिकरणले जनाएको छ। आयोजनामा अझै फसेकाहरूको अवस्थाबारे जानकारी लिँदै उनीहरूलाई आवश्यक राहत उपलब्ध गराउन उद्धार टोली परिचालन गरिएको छ। टनेलभित्र रहेका व्यक्तिहरूलाई सुरक्षित रूपमा बाहिर ल्याउन हेलिकप्टरसहित आवश्यक स्रोतसाधन प्रयोग भइरहेको छ। प्राधिकरणले खोजी तथा उद्धार कार्यलाई तीव्र बनाइएको जनाएको छ।

Originally published on abcnews.com.np.