काठमाडौं । नेपाल–चीन सीमावर्ती क्षेत्र केरुङमा पहिरोका कारण नदी थुनिएर बनेको अस्थायी तालबाट भइरहेको पानीको ओभरफ्लो रोकिएको चिनियाँ सरकारी सञ्चारमाध्यमहरूले जनाएका छन्।

ताल भरिएर पानी बाँधमाथिबाट बग्न थालेपछि केही समयका लागि खोज तथा उद्धार कार्य स्थगित गरिएको थियो। जोखिम केही कम भएपछि चिनियाँ अधिकारीहरूले उद्धार कार्य पुनः सुरु गरेका हुन्। पछिल्लो विवरणअनुसार तालमा २५ लाख घनमिटरभन्दा बढी पानी जम्मा भएको थियो।

यसअघि नेपाल प्रहरीले तिब्बततर्फ बनेको अस्थायी बाँध फुट्न सक्ने भन्दै नदी आसपासका बासिन्दालाई सतर्क रहन आग्रह गरेको थियो। तालबाट पानी ओभरफ्लो हुन थालेपछि नेपालतर्फ पनि थप बाढीको जोखिम बढेको थियो।

२४ घण्टा निगरानी

चिनियाँ अधिकारीहरूले तालको पानीको सतह र अवस्थालाई २४सै घण्टा निगरानीमा राखेका छन्। जोखिमको अवस्था मूल्यांकन गर्न चिनियाँ उद्धार तथा प्राविधिक टोली परिचालन गरिएको छ।

यसअघि पानीको बहाव बढेपछि चिनियाँ उद्धार टोलीलाई सुरक्षित स्थानमा फर्कन निर्देशन दिइएको थियो। अहिले अवस्था केही स्थिर भएपछि उद्धार तथा खोजी गतिविधि पुनः अघि बढाइएको अन्तर्राष्ट्रिय सञ्चारमाध्यमहरूले जनाएका छन्।

केरुङ क्षेत्रमा बनेको यो अस्थायी ताल बुधबार आएको भीषण बाढी र पहिरोपछि नदीमा थुप्रिएको माटो तथा भग्नावशेषले नदी थुनेर बनेको हो। तालबाट पुनः ठूलो मात्रामा पानी बाहिरिएमा नेपालतर्फ थप बाढी आउन सक्ने जोखिम कायमै रहेको अधिकारीहरूले बताएका छन्।

Originally published on abcnews.com.np.