काठमाडौं । रसुवामा आएको विनाशकारी बाढीपछि कैलाश–मानसरोवर यात्रामा गएका ६४४ जना यात्रु तथा सम्बन्धित व्यक्तिको नामनामेसीसहितको विवरण प्राप्त भएको छ। सम्पर्कविहीनमध्ये १२७ जना नेपाली नागरिक रहेको बताइएको छ भने सबैभन्दा धेरै १७८ जना भारतीय नागरिक सम्पर्कविहीन छन्।

सम्पर्कविहीन हुनेमा जी इन्टरटेनमेन्ट इन्टरप्राइजेज लिमिटेडका पूर्वसीईओ अतुल दास र उनकी पत्नी पायल दाससमेत परेका छन्। उनीहरू ऋचा टुर्स एण्ड ट्राभल्समार्फत कैलाश–मानसरोवर यात्रामा गएको बताइएको छ।

इपिक टीभीका डिस्ट्रिब्युसन शिवु चाकोका अनुसार उक्त ट्राभल्स कम्पनीमार्फत गएका ६८ जना यात्रु तथा सम्बन्धित व्यक्तिसँग हालसम्म सम्पर्क हुन सकेको छैन।

बालुवाटारस्थित ऋचा टुर्स एण्ड ट्राभल्सका समीर गाइजुका अनुसार सम्पर्कविहीनमध्ये ६१ जना भारतीय नागरिक, सात जना एनआरआई तथा १८ जना ट्रेक्सका कर्मचारी रहेका छन्।

उनीहरू याङ्गिला होटल एण्ड लजमा बसेका थिए। बुधबार बिहान ८ बजेसम्म उनीहरू रसुवाको टिमुरे क्षेत्रबाट सम्पर्कमा रहेको जानकारी प्राप्त भएको थियो। त्यसपछि भने उनीहरूको अवस्थाबारे कुनै जानकारी प्राप्त हुन सकेको छैन।

त्यसबेला उनीहरू अध्यागमन कार्यालयमा आवश्यक पास तथा प्रक्रिया पूरा गर्ने क्रममा रहेको बताइएको थियो। तर, सोही दिन आएको विनाशकारी बाढीपछि उनीहरूसँगको सम्पर्क टुटेको हो।

बाढीपछि रसुवा क्षेत्रमा सञ्चार सेवा, सडक तथा अन्य पूर्वाधारमा व्यापक क्षति पुगेकाले सम्पर्कविहीन यात्रुहरूको खोजी तथा उद्धार कार्य जटिल बनेको छ। सम्बन्धित सरकारी निकाय, सुरक्षा निकाय र स्थानीय प्रशासनले सम्पर्कविहीन नेपाली तथा विदेशी नागरिकको खोजी कार्यलाई तीव्र बनाइरहेका छन्।

Originally published on abcnews.com.np.