काठमाडौं । बुधबार बिहान रसुवाको भोटेकोशी नदीमा आएको विनाशकारी बाढीपछि स्वदेशी तथा विदेशी गरी कुल ३८४ जना पर्यटक सम्पर्कविहीन भएका छन्।

नेपाल पर्यटन बोर्डले सम्पर्कविहीन पर्यटकहरूको संख्या पुष्टि गर्दै उनीहरूको खोजी, अवस्थाबारे जानकारी संकलन तथा सम्बन्धित निकायसँग समन्वय भइरहेको जनाएको छ।

बोर्डका अनुसार सम्पर्कविहीनमध्ये २९१ जना विदेशी पर्यटक र ९३ जना स्वदेशी पर्यटक रहेका छन्। विदेशी पर्यटकमध्ये १०५ जनाभन्दा बढी भारतीय नागरिक रहेको प्रारम्भिक विवरणमा उल्लेख छ भने अन्य पर्यटक विभिन्न देशका रहेका छन्।

बुधबार बिहान करिब साढे ८ बजे चीनको तिब्बततर्फबाट आएको आकस्मिक बाढी भोटेकोशी नदीमा प्रवेश गरेपछि रसुवाको टिमुरे, रसुवागढी र स्याफ्रुबेँसीलगायत क्षेत्रमा व्यापक क्षति पुगेको थियो। बाढीको प्रभाव नुवाकोट र धादिङ हुँदै तल्लो तटीय क्षेत्रसम्म फैलिएको छ।

नेपाल पर्यटन बोर्डले होटल, ट्राभल तथा ट्रेकिङ एजेन्सी, स्थानीय प्रशासन, सुरक्षा निकाय र अन्य सरोकारवाला संस्थासँग समन्वय गरी सम्पर्कविहीन पर्यटकहरूको नाम, राष्ट्रियता, अन्तिम अवस्थिति र सम्भावित स्थानबारे विस्तृत विवरण संकलन गरिरहेको जनाएको छ।

बाढी प्रभावित क्षेत्रमा खोज तथा उद्धार कार्य जारी रहे पनि सडक तथा सञ्चार सम्पर्कमा आएको अवरोधका कारण पर्यटकहरूको यकिन अवस्थाबारे थप विवरण आउन बाँकी रहेको छ।

Originally published on abcnews.com.np.