चितवन । रसुवा बाढीमा परी चितवन जिल्लाका विभिन्न स्थानबाट सङ्कलन गरिएका २ सय ३३ शवमध्ये पहिचान हुन नसकेका २ सय २९ शव जमिनमुनि गाडेर व्यवस्थापन गरिने भएको छ ।

पहिचान भएका चार शवबाहेक बाँकी शव सडेको अवस्थामा पुगेका र महामारी फैलिने जोखिम बढेपछि जिल्ला सुरक्षा समितिको निर्णयअनुसार शव व्यवस्थापन गर्न लागिएको हो ।

होल्डिङ सेन्टर, स्वास्थ्य संस्था तथा नदी तटीय क्षेत्रबाट सङ्कलन गरिएका शव तथा शवका अवशेष कुहिन थालेको र दुर्गन्धका कारण सङ्क्रमण तथा महामारी फैलिन सक्ने भन्दै स्वास्थ्य क्षेत्रका विज्ञले चेतावनी दिएका थिए ।

सोही राय र विश्लेषणका आधारमा शवलाई थप सड्न–गल्न नदिन तथा सुरक्षित र कानुनी रूपमा व्यवस्थापन गर्न जमिनमुनि गाड्ने निर्णय गरिएको जिल्ला प्रशासन कार्यालय चितवनले जनाएको छ ।

जिल्ला सुरक्षा समिति चितवनको आज बिहान बसेको बैठकले ‘पहिचान नभएका तथा बेवारिसे शव व्यवस्थापन (पहिलो संशोधन) निर्देशिका, २०८३’ बमोजिम शव व्यवस्थापन गर्ने निर्णय गरेको प्रमुख जिल्ला अधिकारी गणेश अर्यालले जानकारी दिए ।

भविष्यमा शवको पहिचान गर्न सहज होस् भनेर प्रत्येक शवको डिएनए नमुना सङ्कलन गरी सङ्केत नम्बरका आधारमा विस्तृत अभिलेख सुरक्षित राखिने प्रशासनले जनाएको छ ।

शवको अन्तिम संस्कार भरतपुर महानगरपालिका–१ स्थित देवघाटको खुला स्थानमा जमिनमुनि गाडेर गरिने प्रजिअ अर्यालले जानकारी दिए ।

बाध्यात्मक परिस्थितिका कारण शवलाई जमिनमुनि व्यवस्थापन गर्नुपरेको भन्दै जिल्ला प्रशासन कार्यालयले पीडित परिवारजनमा पर्न गएको असुविधाप्रति क्षमायाचना गरेको छ ।

Originally published on abcnews.com.np.