सिरहा । रसुवाको भोटेकोशी नदीमा आएको भीषण बाढीबाट प्रभावित नागरिकको राहत, उद्धार तथा पुनर्स्थापनाका लागि सिरहाको गोलबजार नगरपालिकाले पाँच लाख ५५ हजार ५५५ रुपैयाँ सहयोग गर्ने निर्णय गरेको छ।

नगरपालिकाले शुक्रबार जारी गरेको प्रेस विज्ञप्तिअनुसार बाढीका कारण रसुवा, नुवाकोट, धादिङ, चितवनलगायत जिल्लामा भएको ठूलो जनधनको क्षतिप्रति दुःख व्यक्त गर्दै प्रधानमन्त्री दैवी प्रकोप उद्धार कोषमा उक्त रकम उपलब्ध गराउने निर्णय गरिएको हो।

नगर प्रमुख श्यामकुमार श्रेष्ठका अनुसार नगरपालिकाले पाँच दिनभित्र प्रधानमन्त्री दैवी प्रकोप उद्धार कोषमा रकम जम्मा गर्नेछ। नगरपालिकाले बिहीबार कार्यपालिका बैठक बसेर सहयोग गर्ने निर्णय गरेको हो।

नगरपालिकाले प्राकृतिक विपद्मा ज्यान गुमाएका नागरिकप्रति श्रद्धाञ्जली तथा शोकसन्तप्त परिवारजनमा समवेदना व्यक्त गरेको छ। साथै बाढी, डुबान तथा अन्य विपद्बाट प्रभावित नागरिकको शीघ्र स्वास्थ्यलाभ र सुरक्षित पुनर्स्थापनाको कामना गरेको छ।

विपद्को कठिन घडीमा प्रभावित नागरिकको जीवनरक्षा, खोज तथा उद्धार, राहत वितरण र पुनर्स्थापनाका लागि नेपाल सरकार, प्रदेश सरकार, स्थानीय तह, सुरक्षा निकाय, विभिन्न संघ–संस्था तथा नागरिक समाजबाट भइरहेका प्रयासप्रति नगरपालिकाले एकबद्धता जनाएको छ।

विपद् प्रभावित नागरिकलाई तत्काल राहत तथा आवश्यक सहयोग उपलब्ध गराउनु राज्य र समाज सबैको साझा दायित्व भएको भन्दै नगरपालिकाले मानवीय सहयोग र सहकार्यका लागि सदैव तत्पर रहेको जनाएको छ।

नगरपालिकाले प्रतिकूल मौसम तथा आगामी दिनमा हुन सक्ने सम्भावित बाढी, डुबान र अन्य प्राकृतिक विपद्को जोखिमलाई मध्यनजर गर्दै नदी तथा खोला किनार, होचा तथा डुबानको सम्भावना भएका स्थानमा बसोबास गर्ने नागरिकलाई उच्च सतर्कता अपनाउन आग्रह गरेको छ।

यसअघि लहान नगरपालिकाले पनि रसुवा बाढीपीडितका लागि ११ लाख रुपैयाँ सहयोग गर्ने निर्णय गरेको थियो। गोलबजारको निर्णयसँगै सिरहाका दुई स्थानीय तहले रसुवा बाढीपीडितलाई आर्थिक सहयोग गर्ने निर्णय गरेका छन्। सिरहामा १७ वटा स्थानीय तह छन्।

नगरपालिकाले विपद् कुनै एक व्यक्ति वा समुदायको मात्र समस्या नभई सम्पूर्ण समाजको साझा चुनौती भएकाले कठिन परिस्थितिमा एकअर्कालाई सहयोग गर्दै मानवीय संवेदना, सहकार्य र एकताको भावना प्रदर्शन गर्न नागरिक तथा सरोकारवालालाई अपिल गरेको छ।

Originally published on abcnews.com.np.