काठमाडौं ।भोटेकोशी नदीमा आएको बाढीका कारण क्षतिग्रस्त जलविद्युत् आयोजनामा कार्यरत ८९८ जना सम्पर्कविहीन रहेको स्वतन्त्र ऊर्जा उत्पादकहरूको संस्था, नेपाल (इप्पान) को विवरणमा उल्लेख छ।

बाढीबाट प्रभावित आयोजनाको संख्या ११ रहेको छ। इप्पानको विवरणअनुसार रसुवा जिल्लाका ७ वटा बाढी प्रभावित जलविद्युत् आयोजनामा ७३० जना सम्पर्कविहीन छन्।

रसुवामा प्रभावित आयोजनामा माथिल्लो त्रिशुली–१, रसुवागढी जलविद्युत् आयोजना, रसुवा–भोटेकोशी, माथिल्लो मेलुङ–ए, लाङटाङ खोला, चिलिमे र मेलुङ खोला रहेका छन्।

२१६ मेगावाटको माथिल्लो त्रिशुली–१ आयोजनामा ५७६ जना सम्पर्कविहीन छन्। यसको प्रवर्द्धक नेपाल वाटर एण्ड इनर्जी डेभलपमेन्ट कम्पनी (एनडब्लूईडीसी) हो। १११ मेगावाटको रसुवागढी जलविद्युत् आयोजनामा ९३ जना सम्पर्कविहीन छन्। यसको प्रवर्द्धक रसुवागढी हाइड्रोपावर कम्पनी हो।

१२० मेगावाटको रसुवा–भोटेकोशी आयोजनामा ४ जना सम्पर्कविहीन छन्। यसको प्रवर्द्धक लाङटाङ भोटेकोशी हाइड्रोपावर कम्पनी प्रालि हो। ६.४२ मेगावाटको माथिल्लो मेलुङ–ए आयोजनाको प्रवर्द्धक इनर्जी इन्जिनियरिङ प्रालि हो। २० मेगावाटको लाङटाङ खोला आयोजनामा ४२ जना सम्पर्कविहीन छन्।

२२ मेगावाटको चिलिमे आयोजनामा ८ जना र ५ मेगावाटको मेलुङ खोला आयोजनामा ७ जना सम्पर्कविहीन छन्। चिलिमे जलविद्युत् कम्पनी र मैलुङ खोला जलविद्युत् कम्पनी लिमिटेड क्रमशः यी आयोजनाका प्रवर्द्धक हुन्। नुवाकोटका ६ आयोजनामा १६८ जना सम्पर्कविहीन इप्पानको विवरणअनुसार नुवाकोटका ६ वटा बाढी प्रभावित प्रमुख जलविद्युत् आयोजनामा १६८ जना सम्पर्कविहीन छन्।

प्रभावित आयोजनामा त्रिशुली जलविद्युत् आयोजना, देवीघाट जलविद्युत्, माथिल्लो त्रिशुली–३ए, माथिल्लो त्रिशुली–३बी, मिडल त्रिशुली गंगा र नुवाकोट सौर्य विद्युत् आयोजना रहेका छन्। २४ मेगावाटको त्रिशुली जलविद्युत् आयोजनामा १ जना र १४.१ मेगावाटको देवीघाट जलविद्युत्मा १ जना सम्पर्कविहीन छन्।

दुवै आयोजनाका प्रवर्द्धक नेपाल विद्युत् प्राधिकरण हुन्। ६० मेगावाटको माथिल्लो त्रिशुली–३एमा ४२ जना सम्पर्कविहीन छन्। यसको प्रवर्द्धक नेपाल विद्युत् प्राधिकरण हो। त्यस्तै, ३७ मेगावाटको माथिल्लो त्रिशुली–३बी आयोजनामा १२२ जना सम्पर्कविहीन छन्। १५.६ मेगावाटको मिडल त्रिशुली गंगा आयोजनामा दुई जना सम्पर्कविहीन छन्।

यसको प्रवर्द्धक पर्फेक्ट इनर्जी डेभलपमेन्ट प्रालि हो। त्यस्तै, २५ मेगावाटको नुवाकोट सौर्य विद्युत् आयोजनाका प्रवर्द्धक नेपाल विद्युत् प्राधिकरण हुन्। ३६१ जनाको उद्धार इप्पानको सूचनामा २१६ मेगावाटको माथिल्लो त्रिशुली–१ बाट २५४ जनाको उद्धार गरिएको उल्लेख छ।

आयोजनाको सुरुङमा हाल ३०० जना फसेको र उद्धारका लागि चीनबाट टोली आउने क्रममा रहेको जनाइएको छ। त्यस्तै, २० मेगावाटको लाङटाङ खोलाबाट १८ जना र ३७ मेगावाटको त्रिशुली–३ बी आयोजनाबाट ९१ जनाको जीवितै उद्धार गरिएको सूचनामा उल्लेख छ। यससँगै हालसम्म ३६१ जनाको उद्धार भइसकेको इप्पानले जनाएको छ।

Originally published on abcnews.com.np.