त्रिशूली (नुवाकोट) । भोटेकोशी नदीमा आएको विनाशकारी बाढीबाट उद्धार गरिएका घाइते तथा प्रभावितलाई नुवाकोटको त्रिशूलीस्थित नेपाली सेनाको सैन्य तालिम केन्द्रमा ल्याउने क्रम जारी छ।

केही घाइतेलाई हेलिकप्टरमार्फत सिधै काठमाडौं ल्याएर उपचार भइरहेको छ भने सामान्य अवस्थाका घाइतेलाई सैन्य तालिम केन्द्रमै प्राथमिक उपचार भइरहेको छ।

बाढीमा सुरुङभित्र फसेका विदुर नगरपालिका–१३ का धनबहादुर तामाङलाई नेपाली सेनाले शनिबार हेलिकप्टरमार्फत उद्धार गरेको छ। सुरुङका चालक रहेका तामाङले बाढी एक्कासि आएपछि आफूहरू आत्तिएको बताए।

‘एक्कासी बाढी आयो, त्यसपछि केही थाहा छैन,’ उनले भने।

तामाङका अनुसार बाढी आएको दिन आफू सुरुङबाट बाहिर निस्किन सफल भएका थिए। त्यसपछि रातभर क्याम्पमा बसेको र खोला घटेपछि माथिल्लो गाउँमा गएर बसेको उनले बताए।

‘हामी टनेलबाट बढीमा २० जना निस्किएका थियौँ। आफैं निस्किएका हौँ। अहिले पनि गाडीभित्रै शवहरू त्यतिकै छन्,’ उनले भने।

सुरुङभित्र अझै धेरै मानिस रहेको आफूलाई जानकारी भएको तामाङले बताए। उद्धारपछि भावुक बनेका उनले सुरुङमा रहेका अन्य व्यक्तिको पनि सकुशल उद्धार हुने आशा व्यक्त गरे।

‘अब चाहिँ बाँच्ने आशा छ। बाँचेकाहरूको उद्धार भइदिए हुन्थ्यो जस्तो लाग्छ,’ उनले भने।

अस्पतालमा घाइतेको उपचार

भदौ १० गते भोटेकोशी नदीमा आएको बाढीबाट प्रभावित रसुवा, नुवाकोट र धादिङमा खोज तथा उद्धार कार्य जारी छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीबाट उद्धार गरिएका घाइतेको काठमाडौं उपत्यकाका १३ वटा अस्पतालमा उपचार भइरहेको छ।

नेपाल मेडिकल कलेज, वीरेन्द्र सैनिक अस्पताल, त्रिवि शिक्षण अस्पताल, मनमोहन मेमोरियल मेडिकल कलेज, राष्ट्रिय ट्रमा सेन्टर, ग्रिनसिटी अस्पताल, वीर अस्पताल, नर्भिक अस्पताल, मनमैजु शुभम् अस्पताल, ग्रान्डी अस्पताल, ह्याम्स अस्पताल, प्रसूति गृह र सशस्त्र प्रहरी बल (एपीएफ) अस्पतालमा घाइतेको उपचार भइरहेको छ।

त्रिशूली–३ ‘ए’ मा उद्धारका लागि उत्खनन जारी

यसैबीच, त्रिशूली–३ ‘ए’ जलविद्युत् आयोजनाको सुरुङमा फसेका व्यक्तिको उद्धारका लागि उत्खनन कार्य जारी रहेको प्रधानमन्त्री तथा मन्त्रिपरिषद्को कार्यालयले जनाएको छ।

कार्यालयका अनुसार सुरुङमा फसेकाको उद्धारका लागि हालसम्म २० फिटभन्दा बढी भाग उत्खनन भइसकेको छ।

सुरुङको माथिल्लो भागसम्म पहुँच पुर्‍याएर उद्धारका लागि थप उत्खनन गर्ने काम भइरहेको छ। सुरुङभित्र फसेका व्यक्तिको जीवनरक्षाका लागि उद्धार टोलीले निरन्तर प्रयास गरिरहेको छ।

Originally published on abcnews.com.np.