काठमाडौं । भोटेकोसी नदीमा आएको विनाशकारी बाढीका कारण रसुवा, नुवाकोट र धादिङका १६ विद्यालयमा क्षति पुगेको छ भने २३८ विद्यार्थी र १३ शिक्षक सम्पर्कविहीन भएका छन् ।

शिक्षा तथा खेलकुद मन्त्रालयका अनुसार शनिबारसम्म प्राप्त प्रारम्भिक विवरणमा तीन जिल्लाका विद्यालयमा क्षति हुनुका साथै विद्यार्थी र शिक्षक गरी २५१ जना सम्पर्कविहीन रहेको जानकारी आएको छ ।

मन्त्रालयका अनुसार रसुवाका चार, नुवाकोटका आठ र धादिङका चार विद्यालयमा पूर्ण, आंशिक तथा सामान्य क्षति पुगेको छ । रसुवाको उत्तरगया र गोसाइँकुण्ड गाउँपालिका, नुवाकोटको विदुर नगरपालिका तथा धादिङको गल्छी गाउँपालिका र नीलकण्ठ नगरपालिकाका विद्यालय प्रभावित भएका छन् ।

बाढीले केही विद्यालयका भवन तथा संरचना बगाएको छ भने कतिपय विद्यालयका कक्षाकोठा लेदो, बालुवा र माटोले पुरिएका छन् ।

रसुवाका चारवटै विद्यालय पूर्ण रूपमा क्षतिग्रस्त भएका छन् । नुवाकोटमा चार विद्यालय पूर्ण र चार विद्यालयमा आंशिक क्षति पुगेको मन्त्रालयले जनाएको छ ।

आंशिक क्षति पुगेको विदुर नगरपालिकास्थित चण्डेश्वरी माध्यमिक विद्यालयका १२ विद्यार्थी र एक शिक्षक सम्पर्कविहीन छन् ।

धादिङमा एक विद्यालय पूर्ण रूपमा क्षतिग्रस्त भएको छ भने तीन विद्यालयमा आंशिक क्षति पुगेको छ ।

उत्तरगया गाउँपालिकास्थित नीलकण्ठ माध्यमिक विद्यालयको भवनमा क्षति नपुगे पनि त्यहाँ अध्ययनरत दुई सय विद्यार्थी र चार शिक्षक सम्पर्कविहीन रहेको विवरणमा उल्लेख छ ।

त्यस्तै, गोसाइँकुण्ड गाउँपालिकास्थित कोमीश्यामेवाङ्फेल माध्यमिक विद्यालयका १६ विद्यार्थी र एक शिक्षक बाढीपछि सम्पर्कविहीन भएका छन् ।

गोसाइँकुण्ड तीर्थयात्रामा गएका धादिङका चार शिक्षकसमेत सम्पर्कविहीन रहेको मन्त्रालयले जनाएको छ । रसुवाको नेपाल राष्ट्रिय आधारभूत विद्यालयमा कार्यरत १० शिक्षक मध्ये तीन जना मात्रै सम्पर्कमा आएको मन्त्रालयको विवरणमा उल्लेख छ ।

नुवाकोटको त्रिभुवन बहुमुखी क्याम्पस र त्रिभुवन त्रिशूली माध्यमिक विद्यालयको छात्रावाससमेत बाढी तथा लेदोले पुरिएको छ ।

क्षति पुगेका शैक्षिक संस्थामध्ये अधिकांश सामुदायिक विद्यालय रहेका छन् भने केही निजी विद्यालयसमेत प्रभावित भएका छन् । नुवाकोटको त्रिशूली सामुदायिक बोर्डिङ स्कुलका तीन विद्यार्थीसमेत सम्पर्कविहीन रहेको मन्त्रालयले जनाएको छ ।

मन्त्रालयले बाढीबाट भएको शैक्षिक क्षेत्रको क्षतिको पूर्ण विवरण अझै संकलन भइरहेको जनाएको छ । प्रारम्भिक विवरण भएकाले विद्यालय तथा विद्यार्थी–शिक्षकको क्षतिको संख्या थप बढ्न सक्ने मन्त्रालयको भनाइ छ ।

Originally published on abcnews.com.np.