काठमाडौं । नेकपा (एमाले)का अध्यक्ष केपी शर्मा ओलीले रसुवामा आएको विनाशकारी बाढीपछि सरकारले खोज, उद्धार र राहत कार्य प्रभावकारी रूपमा सञ्चालन गर्न नसकेको आरोप लगाएका छन्।

सोमबार एमाले केन्द्रीय कार्यालय च्यासलमा एमाले राजधानी प्रदेश कमिटीले बाढीपीडितका लागि हस्तान्तरण गरेको १० लाख रुपैयाँको चेक ग्रहण गर्दै ओलीले सरकारको विपद् व्यवस्थापन शैलीप्रति असन्तुष्टि जनाएका हुन्।

ओलीले राष्ट्रिय स्वतन्त्र पार्टी (रास्वपा)का सांसद तथा मन्त्रीहरूलाई लक्षित गर्दै विपद् प्रभावित क्षेत्रमा पुगेका केही जनप्रतिनिधिले नागरिकलाई हप्कीदप्की गर्ने, केहीले आधारहीन निर्देशन दिने र केहीले समस्या समाधान गर्नुको सट्टा थप समस्या सिर्जना गर्ने टिप्पणी गरे।

“कोही जान्छन् नागरिकलाई हप्कीदप्की गरेर फर्किन्छन्, बडप्पन देखाउँछन्। कोही जान्छन् आधारहीन निर्देशन दिएर फर्किन्छन्। कोही समस्यामाथि समस्या थपेर फर्किन्छन्,” ओलीले भने।

ओलीले विपद्को समयमा केन्द्रीय सरकारको उपस्थिति नै खोज्नुपर्ने अवस्था आएको टिप्पणी गरे।

“यस्तो अवस्थामा सरकार कहाँ छ खोज्नुपर्छ। कहिले कहिले हेलिकोप्टरमा उडेको देखिन्छ। घरको छतमा मान्छे छ भने निकालेको देखिन्छ। यस्तै यस्तै काम गरेको देखिन्छ। तैपनि धन्यवाद, केही त गरेको छ,” उनले भने।

उनले उद्धारमा निजी क्षेत्रका हेलिकोप्टर प्रयोग गर्न सरकारले रोक लगाएको भन्दै असन्तुष्टि व्यक्त गरे।

उद्धारका लागि तालिम प्राप्त जनशक्ति तथा हेलिकोप्टर भएका निजी क्षेत्रका संस्थालाई समेत परिचालन गर्न सके खोज तथा उद्धार कार्य थप प्रभावकारी बन्न सक्ने ओलीको भनाइ छ।

‘सुरुङभित्रको उद्धार हेलिकोप्टरबाट सम्भव हुँदैन’

ओलीले सुरुङ तथा अन्य जोखिमयुक्त संरचनामा फसेकाको उद्धार हेलिकोप्टरबाट मात्र सम्भव नहुने बताए।

उनका अनुसार यस्ता स्थानमा दक्ष प्राविधिक, उद्धारकर्मी र आवश्यक उपकरण परिचालन गर्नुपर्ने भए पनि सरकारले त्यसतर्फ पर्याप्त ध्यान दिन नसकेको देखिएको छ।

बाढीमा बेपत्ता भएका आफन्तको खोजीमा परिवार तथा आफन्तलाई समेत आवश्यक पहुँच नदिइएको भन्दै ओलीले आपत्ति जनाए।

रसुवाको भोटेकोसी क्षेत्रमा आएको बाढीबाट ठूलो जनधनको क्षति भएको र अझै ठूलो संख्यामा नागरिक सम्पर्कविहीन रहेको अवस्थामा सरकारले सबै उपलब्ध स्रोतसाधन परिचालन गरी खोज, उद्धार तथा राहतलाई तीव्रता दिनुपर्ने ओलीले बताएका छन्।

Originally published on abcnews.com.np.