काठमाडौं । रसुवाको भोटेकोसी नदीमा आएको विनाशकारी बाढीबाट प्रभावित जलविद्युत् आयोजनाहरूमा भइरहेको खोज तथा उद्धारको प्रगतिबारे ऊर्जा, जलस्रोत तथा सिँचाइ मन्त्री विराजभक्त श्रेष्ठ र पूर्वाधार विकासमन्त्री सुनिल लम्सालले जानकारी लिएका छन्। ऊर्जामन्त्री श्रेष्ठको कार्यकक्षमा नेपाली सेनाका उच्च अधिकारीहरूले जलविद्युत् आयोजना तथा सुरुङमार्गमा भइरहेको खोज तथा उद्धारको पछिल्लो अवस्थाबारे मन्त्रीद्वयलाई ब्रिफिङ गरेका हुन्। ब्रिफिङका क्रममा बाढीबाट प्रभावित हरेक जलविद्युत् आयोजना र सुरुङमा भइरहेको उद्धार अभियानको प्रगतिबारे जानकारी गराइएको थियो। मन्त्रीद्वय श्रेष्ठ र लम्सालले उद्धार अभियानको पछिल्लो अवस्थाबारे जानकारी लिएसँगै आगामी रणनीतिबारे समेत छलफल गरेका छन्। ऊर्जा मन्त्रालयका अनुसार छलफलमा उद्धार कार्यलाई प्रभावकारी बनाउने विषयमा केन्द्रित भएर जानकारी आदानप्रदान भएको थियो। ब्रिफिङमा प्रतिनिधिसभा सदस्य डा. अमरेशकुमार सिंहको पनि सहभागिता थियो।

Originally published on abcnews.com.np.