हेटौँडा । बागमती प्रदेश सरकारले भोटेकोसी बाढीका कारण अभिभावक गुमाएका बालबालिकाको आवाससहित कक्षा १२ सम्म निःशुल्क अध्ययनको व्यवस्था गर्ने निर्णय गरेको छ ।

हेटौँडास्थित मुख्यमन्त्री तथा मन्त्रिपरिषद्को कार्यालयमा बिहीबार बसेको मन्त्रिपरिषद् बैठकले बाढीबाट प्रभावित तथा अभिभावकविहीन भएका बालबालिकालाई प्रदेश सरकारले संरक्षण गर्दै आवाससहित शिक्षा प्रदान गर्ने निर्णय गरेको हो ।

प्रदेश सरकारका प्रवक्ता भरत केसीले बैठकको निर्णय सार्वजनिक गर्दै रसुवा, नुवाकोट, धादिङ, चितवनलगायत बाढी प्रभावित क्षेत्रका अभिभावक गुमाएका बालबालिकालाई प्रदेश सरकारले जिम्मा लिने बताए ।

तथ्यांक संकलनपछि संरक्षणको प्रक्रिया

बाढीका कारण कति बालबालिकाले अभिभावक गुमाएका छन् भन्ने यकिन तथ्यांक संकलन गरी उनीहरूलाई आवासीय सुविधासहित अध्ययनको व्यवस्था गरिने प्रवक्ता केसीले जानकारी दिए ।

उनका अनुसार प्रदेश सरकारले त्यस्ता बालबालिकाको शिक्षा मात्र नभई उनीहरूको आवास र संरक्षणको जिम्मेवारीसमेत लिनेछ ।

विपद्का कारण अभिभावक गुमाएका बालबालिकाको भविष्य अन्योलमा पर्न नदिन प्रदेश सरकारले दीर्घकालीन संरक्षणको नीति अघि सारेको हो ।

जिल्ला र स्थानीय तहमा विपद् कोषको रकम

मन्त्रिपरिषद् बैठकले बागमती प्रदेशको विपद् व्यवस्थापन कोष परिचालनसम्बन्धी कार्यविधि संशोधन गर्ने निर्णयसमेत गरेको छ ।

संशोधित कार्यविधिअनुसार विपद् व्यवस्थापनका लागि आवश्यक रकम जिल्ला तथा स्थानीय तहमा नै निकासा गर्ने व्यवस्था मिलाइने प्रवक्ता केसीले बताए ।

यसबाट बाढी–पहिरोलगायत विपद्बाट प्रभावित क्षेत्रमा राहत, उद्धार तथा तत्कालीन व्यवस्थापनका लागि स्थानीय तहले आवश्यक स्रोत छिटो परिचालन गर्न सक्ने प्रदेश सरकारको अपेक्षा छ ।

Originally published on abcnews.com.np.