पोखरा । पोखराको जेठो सामाजिक संस्था पोखरा उद्योग वाणिज्य संघको नयाँ नेतृत्व चयनका लागि आइतबार बिहानदेखि मतदान सुरु भएको छ । संघको ३६औँ महाधिवेशनअन्तर्गत नयाँ कार्यसमिति चयन गर्न अध्यक्ष पदमा चार उम्मेदवारबीच तीव्र प्रतिस्पर्धा हुँदैछ ।

मतदान बिहान ८ बजेदेखि सुरु भएको हो । साँझ ५ बजेसम्म सञ्चालन हुने मतदानमा अध्यक्ष पदका लागि शोभा गौतम, बलराम आचार्य, उत्तममान बुद्धाचार्य र अर्जुन पोखरेल प्रतिस्पर्धामा छन् ।

आचार्य र गौतमले प्यानलसहित उम्मेदवारी दिएका छन् भने बुद्धाचार्य र पोखरेल स्वतन्त्र रूपमा अध्यक्ष पदका लागि प्रतिस्पर्धामा छन् ।

निर्वाचन समितिका संयोजक दामु अधिकारीका अनुसार निर्वाचनबाट अध्यक्षसहित १५ सदस्यीय नयाँ कार्यसमिति चयन हुनेछ । संघमा करिब २७ सय मतदाता रहेका छन् ।

नयाँ नेतृत्व चयनका लागि व्यवसायीहरू मतदानमा सहभागी भइरहेका छन् । अध्यक्ष पदमा चार उम्मेदवार मैदानमा रहेकाले निर्वाचनलाई व्यवसायी वृत्तमा चासोका साथ हेरिएको छ ।

यसअघि शनिबार संघको ३६औँ महाधिवेशन तथा ७२औँ वार्षिक साधारणसभाको नेपाल उद्योग वाणिज्य महासंघका अध्यक्ष अन्जन श्रेष्ठले उद्घाटन गरेका थिए ।