काठमाडौं । कर्णाली शिवराजले नेपाल भलिबल लिग (एनभीएल)मा लगातार दोस्रो जित दर्ता गरेको छ । आइतबार त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा कर्णालीले खप्तड फाल्कोन्सलाई सोझो सेटमा हराएको हो ।

कर्णालीले खेल २५–१९, २५–१९, २५–१९ ले आफ्नो पक्षमा पार्यो ।

लगातार दोस्रो जितसँगै कर्णालीले दुई खेलबाट ६ अंक जोडेको छ । दुवै खेल गुमाएको फाल्कोन्स अंकविहीन छ । पहिलो खेलमा कर्णालीले अन्नपूर्ण स्पाइकर किंग्सलाई ३–१ को सेटमा पराजित गरेको थियो । खप्तडले भने सगरमाथा स्म्यासर्ससँग सोझो सेटमा हार व्यहोरेको थियो ।

अब कर्णालीले सोमबार सगरमाथा स्म्यासर्स तथा खप्तडले मंगलबार मधेस वारियर्ससको सामना गर्नेछन् । आइतबारै सम्पन्न पहिलो खेलमा अन्नपूर्ण स्पाइकर किंग्सले काठमाडौं रेड्सलाई सोझो सेटमा हराएको थियो ।

Originally published on abcnews.com.np.