काठमाडौं । देशका केही भूभागमा आज भारी वर्षाको सम्भावना रहेको जल तथा मौसम विज्ञान विभागले जनाएको छ। रातिको तुलनामा दिउँसो धेरै स्थानमा भारी वर्षा हुने पूर्वानुमान छ।

दिउँसो कोसी, वाग्मती र गण्डकी प्रदेशका हिमाली तथा पहाडी भूभाग, कर्णालीको पहाडी क्षेत्र तथा लुम्बिनी र सुदूरपश्चिमका पहाडी तथा तराई भूभागका एक–दुई स्थानमा भारी वर्षाको सम्भावना छ।

देशभर सामान्यदेखि पूर्ण बदली रहने र हिमाली भूभागका केही तथा पहाडी क्षेत्रका धेरै स्थानमा मेघगर्जन र चट्याङसहित हल्कादेखि मध्यम वर्षा हुने विभागले जनाएको छ।

लुम्बिनी र सुदूरपश्चिमका तराई भूभागका धेरै स्थान तथा वाग्मती र गण्डकीका तराई क्षेत्रका केही स्थानमा पनि मेघगर्जनसहित मध्यम वर्षाको सम्भावना छ।

राति कोसी प्रदेशका पहाडी तथा तराई भूभागका एक–दुई स्थानमा भारी वर्षा हुन सक्ने विभागले जनाएको छ। अन्य प्रदेशका पहाडी र तराई भूभागका केही स्थानमा समेत मेघगर्जन र चट्याङसहित मध्यम वर्षाको सम्भावना छ।

हाल देशभर मनसुनी वायुको प्रभाव रहेको छ। मनसुनको न्यूनचापीय रेखा सरदर स्थानभन्दा उत्तरतर्फ रहेकाले वर्षाको गतिविधि बढ्ने विभागले जनाएको छ।

Originally published on abcnews.com.np.