काठमाडौं  । भोटेकोशी बाढीपीडितका लागि वितरण गर्न सङ्कलन तथा भण्डारण गरिएका राहत खाद्य सामग्रीमै म्याद गुज्रिएका तथा न्यून गुणस्तरका सामग्री भेटिएका छन्।

राहत सामग्रीको गुणस्तर र खाद्य स्वच्छता सुनिश्चित गर्न खाद्य प्रविधि तथा गुण नियन्त्रण विभाग र खाद्य प्रविधि तथा गुण नियन्त्रण डिभिजन कार्यालय काठमाडौंको संयुक्त टोलीले राजधानीका विभिन्न राहत सङ्कलन केन्द्रमा गरेको आकस्मिक अनुगमनका क्रममा म्याद नाघेका खाद्य सामग्री फेला पारेको हो।

टोलीले राजधानीका पाँच वटा राहत भण्डारण तथा सङ्कलन स्थलमा आकस्मिक निरीक्षण गरेको थियो। स्थापित निकायमा समेत उपभोग्य मिति समाप्त भएका सामग्री भेटिएपछि ती सामग्री जफत गरी छुट्टै राखिएको विभागले जनाएको छ।

विभागका वरिष्ठ खाद्य अनुसन्धान अधिकृत डा. बालकुमारी शर्माका अनुसार विपद्को समयमा प्रभावित क्षेत्रमा पठाइने खाद्य सामग्री स्वास्थ्यका लागि हानिकारक नहोस् भन्ने उद्देश्यले सङ्कलन केन्द्रमै पुगेर गुणस्तर तथा स्वच्छताको सूक्ष्म अनुगमन गरिएको हो।

२१ बोरा भुजा म्याद गुज्रिएको भेटियो

अनुगमनका क्रममा सहरी विकास तथा भवन निर्माण विभाग, बबरमहलमा राखिएका राहत सामग्रीमध्ये गिरिधारी फुड प्रोडक्ट, बुटवलको २१ बोरा भुजाको उपभोग्य मिति समाप्त भएको भेटिएको छ।

विभागले ती सामग्रीलाई तत्काल छुट्टै **‘एक्सपायर्ड जोन’**मा राख्न लगाएर प्रभावित क्षेत्रमा पठाउन रोक लगाएको छ।

त्यस्तै, सामाखुसीस्थित प्रहरी तालिम केन्द्रमा राहतका लागि सङ्कलन गरिएका सामग्रीमध्ये चोकोफन र पाँच केजीको चक्की आटासमेत म्याद नाघेको भेटिएको विभागले जनाएको छ।

त्यहाँ दुई दिन मात्र उपभोग्य अवधि बाँकी रहेका ५९ प्याकेट दालमोठसमेत भेटिएको थियो। विभागले उक्त सामग्री राहतका रूपमा नपठाउन निर्देशन दिएको छ।

२५ किलोका चामल पनि म्याद नाघेका

सामाखुसीस्थित राधास्वामी सत्सङ्ग केन्द्रमा राहतका लागि भण्डारण गरिएका २५ किलोका उसिना चामलको उपभोग्य मिति समाप्त भएको पाइएको छ।

विभागले त्यस्ता सामग्री हटाउन निर्देशन दिएको छ।

यसले विपद्को समयमा राहत सामग्री सङ्कलन गर्दा सहयोगको मात्रा मात्र नभई खाद्य सामग्रीको गुणस्तर र उपभोग्य मिति परीक्षण गर्नु पनि उत्तिकै आवश्यक रहेको देखाएको छ।

दुई स्थानका सामग्री भने मापदण्डअनुसार

अनुगमनका क्रममा सबै राहत सामग्री गुणस्तरहीन भने भेटिएका छैनन्।

खाद्य व्यवस्था तथा व्यापार कम्पनी लिमिटेडको बागमती प्रादेशिक कार्यालय, थापाथलीस्थित गोदाममा राहतका लागि तयारी अवस्थामा राखिएका फोर्टिफाइड चामल, मुसुरो दाल र सूर्यमुखी तेलको लेबल तथा उपभोग्य मिति सही पाइएको विभागले जनाएको छ।

त्यस्तै त्रिभुवन अन्तर्राष्ट्रिय विमानस्थलमा विदेशबाट राहतका लागि प्राप्त सामग्रीको अवस्था पनि सन्तोषजनक पाइएको छ।

त्यहाँ चक्की आटा, चिया, चिनी, लङग्रेन चामल, काबुली चना, रेड राइस फ्लेक्स (चिउरा), नुन, तेल तथा मसालालगायत सामग्रीको अनुगमन गरिएको थियो।

यी दुवै स्थानमा रहेका सामग्री वितरण गर्दा ‘असल वितरण अभ्यास’ पूर्ण रूपमा पालना गर्न विभागले निर्देशन दिएको छ।

‘राहतका नाममा गुणस्तरहीन सामग्री नदिनू’

विपद्को संवेदनशील अवस्थामा राहतका नाममा गुणस्तरहीन वा स्वास्थ्यमा प्रतिकूल असर पार्न सक्ने खाद्य सामग्री वितरण नगर्न विभागले सरोकारवाला सबैलाई सचेत गराएको छ।

विभागले राहत सामग्री सङ्कलन, भण्डारण र वितरणका क्रममा खाद्य सुरक्षाका न्यूनतम मापदण्ड अनिवार्य रूपमा पालना गर्न आग्रह गरेको छ।

बाढीपीडितका लागि पठाइने राहत सामग्रीले पीडितको आवश्यकता पूरा गर्नुपर्नेमा उल्टै स्वास्थ्य जोखिम निम्त्याउन नहुने भन्दै विभागले गुणस्तर परीक्षण र सुरक्षित वितरणमा विशेष ध्यान दिन आग्रह गरेको हो।

विपद्को समयमा प्रभावित परिवारका लागि राहत जीवन धान्ने आधार बन्ने गर्छ। त्यसैले राहतको नाममा म्याद गुज्रिएको खाद्य सामग्री पुग्न नदिन सङ्कलन केन्द्रदेखि वितरणस्थलसम्म निगरानी र गुणस्तर परीक्षण आवश्यक देखिएको छ।

Originally published on abcnews.com.np.