गोरखा, १४ जेठ । बारपाक सुलिकोट गाउँपालिका वार्ड नं ७ देउरालीमा आइतवार देखी जनयुद्धको प्रथम शहीद दिल बहादुर रम्तेलको स्मृतिमा शहीद दिल बहादुर रम्तेल स्मृति कप राष्ट्रिय खुल्ला भलिबल प्रतियोगिता र दौड प्रतियोगिता शुरु भएको छ ।

जातीय साँस्कृतिक झाँकि प्रदर्शनी सहितको शुरु भएको प्रतियोगिताको पूर्व खेलकूद मन्त्री दलजित श्रिपाइलीले समुद्घाटन गर्नुभएको छ । कार्यक्रममा पूर्व माननीय सभासद कृष्ण धिताल, दलित बिकास समीतिका कार्यकारी निर्देशक डा. बुद्धि नेपाली, बारपाक सुलिकोट गाउॅ पालीका अध्यक्ष बिष्नु भट्ट युवा नेता धिरज ऊपरकोटी, जनवादी गायक झाँकर बुढा, लोक गायक सागर गुरुङलगायत बिभिन्न राजनीतिक दलका प्रतिनिधिहरु, समाजसेवी तथा खेलकूद प्रेमीहरूको उपस्थिति रहेको थियो ।

प्रथम पुरस्कार १ लाख, दोस्रो पुरस्कार ६०००० र तेस्रो पुरस्कार ३०००० र विभिन्न ट्रफी सहित रहेको प्रतियोगितामा राष्ट्रिय भलिबल खेलाडीहरूसहित १३ टिमको सहभागिता रहेको छ ।

जनयुद्धको बलमा जनआन्दोलन हुँदै गणतन्त्र प्राप्ति गर्नमा शहीद दिलबहादुर रम्तेल जस्ता होनाहर योद्धाहरूको बलिदानबाट मात्र सम्भव भएकोले शहीदहरूको स्मृतिमा गणतन्त्र दिवसको अवसरमा राष्ट्रिय स्तरको भलिबल प्रतियोगिता शुरु गरिएको गाउँपालिका अध्यक्ष बिष्णु प्रसाद भट्टले बताउनुभयो ।

भोलि मंगलवार १५ गते गणतन्त्र दिवसको दिनसम्म संचालन हुने प्रतियोगितामा करिब १५ लाख खर्च हुने प्रतियोगिताको संयोजक एवं ७ नं वार्डका वार्ड अध्यक्ष कृष्ण गुरुङले जानकारी दिनुभयो ।

श्री शैलपुत्री माध्यमिक बिद्यालयको प्राङ्गण देउरालीमा भएको उद्घाटन समारोह अघि खेलाडी, विद्यार्थी लगायत स्थानीय जातिहरूको साँस्कृतिक झाँकिसहितको –यालीले कार्यक्रमलाई रौनकता थपेको थियो ।