जेठ १६ – विश्वकप अगाडिको अन्तराष्ट्रिय मैत्रीपूर्ण खेलमा अर्जेन्टिना विजयी भएको छ । बुधबार बिहान भएको खेलमा अर्जेन्टिनाले हैटीलाई चार शून्य गोलले पराजित गर्‍याे।

अर्जेन्टिनामा भएको खेलमा घरेलु टिमको जितमा मेसीले ह्याट्रिक गरे । खेलको १७ औं मिनेटमा मेसीले पेनाल्टीमार्फत टिमलाई अग्रता दिलाए ।

पहिलो हाफमा एक गोलको अग्रता बनाएको अर्जेन्टिनाका लागि ५८ औं मिनेटमा फेरि मेसीले गोल गर्दै टिमको अन्तर दुई शून्यमा पुर्‍याए । त्यसपछि ६६ औं मिनेटमा मेसीले गोल गर्दै व्यक्तिगत ह्याट्रिक पूरा गरे भने टिमलाई तीन शून्यमा पुर्‍याए ।

६९ औं मिनेटमा सर्जियो अगुइरोले मेसी कै पासमा गोल गर्दै अर्जेन्टिनालाई चार शून्यको जित दिलाए ।

बुधबार राति भएका अन्य खेलमा अमेरीकाले बोलिभियालाई तीन शून्यले हरायो भने मेक्सिको र वेल्सबीचको खेल गोलरहित बराबरीमा सकियो ।