काठमाडौँ ,१ असार । सुर्खेतमा नेपाल विद्यार्थी संघले पेट्रोलियम पदार्थको वृद्धिको विरुद्धमा पुत्ला दहन गरेको आरोपमा कार्यालयभित्रै पसेर आफ्ना कार्यकर्तामाथि प्रहरीले गरेको धरपकडको घटनाप्रति नेपाली कांग्रेसले आपत्ती जनाएको छ ।

प्रधानमन्त्री केपी शर्मा ओलीको पुत्ला दहन गरेको आरोपमा जिल्ला पार्टी कार्यालयभित्र प्रवेश गरी धरपकड गरेको भन्दै नेपाली कांग्रेसले आपत्ती जनाएको हो । बिहीबार नेविसंघ सुर्खेतले प्रधानमन्त्रीको पुत्ला दहन गरेको थियो।

प्रहरीले सुर्खेतको काँग्रेस पार्टी कार्यालयभित्र प्रवेश गरी हस्तक्षेप गरेको कांग्रेसले बताएको छ । कांग्रेस प्रवक्ता विश्वप्रकाश शर्माले सरकारले ‘जङ्गली शैली’ देखाउँदै सुर्खेतमा पार्टी कार्यलयभित्र प्रवेश गरी आक्रमण गरेको बताए।

उनले सडक लोकतन्त्रको अभिन्न अंग हो, त्यहाँको प्रदर्शनपछि पार्टी कार्यालय भित्रै पसेर दमन गर्ने प्रयत्न जंगली शैली भएको बताए ।