काठमाडौं, २१ असार । बिहीबार मध्यान्ह काठमाडौंको न्युप्लाजास्थित एउटा पोलमा आगलागी भएको छ ।
समयमै आगलागी नियन्त्रण भएकाले ठूलो धनजनको क्षतिबाट बचेको छ । यद्यपि त्यस पोलमा रहेका सबै तार जलेका कारण त्यस स्थानबाट वितरित सेवा भने केही समय प्रभावित भएको छ।

सडकका पोल तथा घरमा अव्यवस्थित रुपमा टाँगिएका तथा सडकमा झुन्डिरहेका विभिन्न दूरसञ्चार सेवाप्रदायक, इन्टरनेट प्रदायक तथा केबल टेलिभिजनका र नेपाल विद्युत् प्राधिकरणका अव्यवस्थित तारका कारण ठूलो दुर्घटना निम्तिने खतरा बढेको छ । यसरी अस्तव्यस्त रुपमा रहेका तारहरु जेलिएका ठाउँमा कुनै कारणवश आगलागी हुन गएमा त्यसले भौतिक सम्पत्ति नस्ट त हुन्छ नै ठूलो धनजनको क्षति समेत हुने स्थिति बन्छ ।

सिंहदरबारको उत्तर गेट र पोलसँगै जोडिएको प्रहरी चौकी तथा व्यस्त चोकमा आगलागी हुँदा यात्रु र सवारी साधन त्रसित भएका थिए । पोलमा यसरी जथाभावी रुपमा राखिएका तार समयमै व्यवस्थापन नगरे भविष्यमा ठूलो जोखिम आउने निश्चित छ ।