चितवन ,२३ साउन । चितवन प्रहरीको विशेष टोलीले भरतपुर महानगरपालिकाको विभिन्न स्थानबाट ४९ तोला भन्दा बढी सुन चोरीगर्ने महिलालाई प्रहरीले पक्राउ गरेको छ ।

भरतपुरको ४ वटा घरबाट ६२ लाख भन्दा बढी मुल्य बराबरको सुनचाँदी चोरी गर्ने मकवानपुर जिल्लाको थाहा नगरपालिका ७ स्थायी घर भएर नवलपुर जिल्लाको गैडाँकोट नगरपालिका २ मा थकाली भान्सा घर संचालन गरि बस्ने सरिता भनीने शोभा बि क लाई प्र्रहरीले पक्राउ गरेको हो ।

जिल्ला प्रहरी कार्यालय चितवनले आज बुधवार पत्रकार सम्मेलन गरि सुनचाँदी चोरी गर्ने शोभा बि.क. र उनको साथबाट बरामद भएको चोरी गर्दा प्रयोग हुने औजारहरु सार्वजनिक गरेको हो ।

पछिल्लो ६ महिनामा शोभाले विभिन्न स्थानमा दिउँसोको समयमा चोरी गरेको प्रहरीले जनाएको छ । उनले दिउँसोको समयमा घरमा कोहि नभएको मौका पारेर चोरी गर्ने गरेको प्रारम्भीक अनुसन्धानबाट खुलेको जिल्ला प्रहरी कार्यालय चितवनका प्रमुख प्रहरी उपरिक्षक सुशिल सिंह राठौरले जानकारी दिए ।

घरहरुमा चोरी गर्दै गरेको सिसि क्यामराको फुटेजको आधारमा उनलाई पक्राउ गर्न सफल भएको राठौरले बताए ।
पछिल्लो समय चोरीको घटनामा बृद्धि भएकाले प्रहरीकोे बिशेष टोली परिचालन गरेको प्रहरीले जनाएको छ । पछिल्लो समय भएका अन्य चोरीको घटनामा संलग्नहरुलाई पनि पक्राउ गरि कारबाहीको दायरामा ल्याइएको र सहकारी संस्थाहरुमा चोरी गर्नेहरु पनि केहिदिनमा नै पक्राउ पर्ने प्रहरी उपरिक्षक राठौरले दावी गरे ।