बेनी, ४ भाद्र । म्याग्दीको बेनी नगरपालिका–४ थामडाँडामा सिङ्गा खानेपानी तथा सरसफाई आयोजना स्किम नम्बर १ को निर्माण कार्य सम्पन्न भएको छ ।

खानेपानी तथा सरसफाई सब डिभिजन कार्यालय मार्फत सञ्चालन भएको सो आयोजनाबाट ३७ घरधुरीको घरघरमा खानेपानी सुविधा विस्तार गरिएको छ । लागत स्टिमेट भन्दा करिब १ लाख कम लगानीमै निर्माण भएको सो आयोजना निर्माणमा कुल रु ५८ लाख ७८ हजार १३० लगानी भएको छ ।

नेपाल सरकारको रु ३९ लाख ९५ हजार २२५ लगानी रहेको सो आयोजनामा स्थानीय उपभोक्ताले रु १८ लाख ८२ हजार ८७७ बराबरको जनसहभागीता जुटाएको खानेपानी तथा सरसफाई सब डिभिजन कार्यालयका प्रमुख ईश्वरी प्रसाद शर्माले जानकारी दिनुभयो ।

वडा नम्बर – ४ को बास्कुना, सुर्केमेला, राक्से र तातोपानीमा समेत एक घर एक धारा जडानको लागि छुट्टाछुट्टै स्किममा काम भैरहेको छ । सो आयोजनाको म्याग्दीका गण्डकी प्रदेश सभाका सांसद विनोद केसीले उद्घाटन गर्नुभयो ।

आयोजनाको उद्घाटन गर्दै सांसद केसीले हरेक नागरिकको घरदैलोमा शुद्ध खानेपानीको पहुँच विस्तार गर्नु वर्तमान सरकारको प्राथमिकतामा परेको बताउँदै आयोजनालाई दिगो र व्यवस्थित बताउनुपर्नेमा जोड दिनुभयो । आयोजना सम्पन्न गर्न स्थानीयबासीले २ महिनासम्म श्रमदान गरेको समितिका अध्यक्ष निरास बहादुर थापाले जानकारी दिनुभयो ।

ठुलो उत्तिसजरा सिस्नेरामा रहेको मुहानमा संकलन केन्द्र र थामडाँडामा वितरण ट्याङ्की निर्माण गरि करिब साढे ५ किलोमिटर मुख्य र सहायक पाईपलाइन मार्फत खानेपानी वितरण गरिएको छ ।

पहिले खानेपानीको चरम अभाब खेपेका थामडाँडाबासीहरुको लागि घरघरमा खानेपानीको पहुँच पुगेपछि शुद्ध खानेपानीको सहज पहुँच विस्तार संगै समयको समेत बचत भएको छ ।

खानेपानीको लागी खोला र कुवाहरुमा भौतारीनुपर्ने बाध्यता रहेको यस गाउँमा खानेपानी आयोजना निर्माणले घरघरमा सहज रुपमा खानेपानीको सुविधा विस्तार गरेको छ ।