संखुवासभा, ४ भाद्र । संखुवासभाको मादी नगरपालिकामा एक जनाको भरुवा बन्दुक लागेर मृत्यू भएको छ । आईतबार साँझ ६ बजेको समयमा मादी नगरपालिका–८ मावादिन बस्ने २५ बर्षीय हस्तबहादुर तामाङको मृत्यू भएको प्रहरीले जनाएको छ ।

उनको मादी नगरपालिका वडा नं.-९ फाबिङ स्थित सिरान रक्टेको जंगलमा मृतअवस्थामा लाश भेटिएको संखुवासभाका प्रहरी निरिक्षक रामजी कटवालले जानकारी दिनुभयो ।

जंगलमा मृतअवस्थामा लाश भेटिएपछि स्थानीयले प्रहरीलाई खबर गरेका थिए । चैनपुर इलाका र जिल्ला सदरमुका खाँदबारीबाट गएको प्रहरी टोलीले घटनास्थल वरपर खोजतलास गर्दा एक थान भरुवा बन्दुक र मृतक हस्तबहादुर तामाङको निधारमा गोली लागेको अवस्थामा भेटिएको प्रनि कटवालले बताउनुभयो ।

मृतक हस्तबहादुर आईतबार जंगलमा सिकार खेल्न गएका थिए । भने उनीसंगै निजको भाई २१ बर्षीय रत्नबहादुर तामाङ र छिमेकी २२ बर्षीय कृष्णबहादुर तामाङ पनि गएका थिए ।

उनीहरुको साथबाट २ थान भरुवा बन्दुक, २ ओटा नाल र भरुवा बन्दुकमा प्रयोग हुने मेटासिटको बट्टामा अन्दाजी ५० ग्राम बारुद, गोलीको रुपमा प्रयोग हुने किटको टुक्रा १० थान, २ थान खुकुरी, टर्चलाईट भेटिएको प्रहरीले जनाएको छ ।

निज २ जनालाई प्रहरीले नियन्त्रणमा लिई अनुसन्धान जारी रहेको प्रहरीले जनाएको छ । घटनास्थल खाँदबारीबाट एक दिनको दुरी टाढा पर्दछ ।