पेरिस, २२ भाद्र । फ्रान्सेली क्लब पेरिस सेन्ट जर्मन (पीएसजी) का स्ट्राइकर केलियन एम्बाप्पे फ्रान्सेली घरेलु लिग वानको आगामी तीन खेलका लागि निलम्बित भएका छन् ।

खेलको क्रममा गलत व्यवहार गर्दै रातो कार्ड पाएका एम्बाप्पेलाई फ्रान्सेली लिग वानको अनुशासन समितिले कारबाहीस्वरूप निलम्बनको निर्णय गरेको हो ।गत साता फ्रान्सेली लिगअन्तर्गत भएको खेलमा पीएसजीले निमेसलाई ४(२ गोलअन्तरले पराजित गर्दा सशक्त प्रदर्शन गरेका एम्बाप्पेले सोही खेलको इन्जुरी समयमा रातो कार्ड पाएका थिए ।

निमेसका तेजी साभानिरले प्रहार गरेको ट्याकलपछि झगडामा उत्रिएका उनलाई रातो कार्ड देखाइएको थियो । एम्बाप्पेलाई खराब ट्याकल प्रहार गर्ने निमेसका जेतीलाई भने पाँच खेलको निलम्बन तोकिएको छ ।

१९ वर्षीय एम्बाप्पे फ्रान्सले गत जुलाईमा रुसमा भएको विश्वकपको उपाधि जित्दाका मुख्य खेलाडी थिए । निलम्बनको निर्णयसँगै एम्बाप्पेले सेप्टेम्बरको १४ तारिख हुने सेइन्ट इटिनी, सेप्टेम्बर २३ मा हुने रेन्नेस र सेप्टेम्बर २६ मा हुने रेइम्सविरुद्धको खेल गुमाउनेछन् । उनले यसबीचमा च्याम्पियन्स लिगअन्तर्गत लिभरपुलविरुद्ध हुने खेल भने खेल्नेछन् ।