नवलपुर । भोटेकोशी नदीमा आएको बाढीले बगाएर ल्याएका २६ वटा शव नवलपुरमा फेला परेका छन्।

जिल्लाको नारायणी नदीको पश्चिमी किनार तथा विभिन्न भङ्गालामा ती शव फेला परेको प्रमुख जिल्ला अधिकारी जगदीश्वर उपाध्यायले जानकारी दिनुभएको छ।

फेला परेका शवमध्ये १२ पुरुष, तीन महिला, चार बालिका र एक बालक रहेका छन्। यस्तै, ६ वटा विभिन्न अंगसमेत फेला परेको प्रशासनले जनाएको छ।

फेला परेका सबै शव गैँडाकोट नगर अस्पतालमा राखिएको छ। शवको पहिचान भने खुल्न बाँकी रहेको जिल्ला प्रहरी कार्यालय नवलपुरले जनाएको छ।

जिल्ला प्रहरी कार्यालयका प्रमुख प्रहरी उपरीक्षक युवराज खड्काका अनुसार बिहानै स्थानीयबाट विभिन्न स्थानमा आठ–नौ वटा शव फेला परेको सूचना आएको थियो। त्यसपछि सुरक्षाकर्मीलाई खोज तथा उद्धारका लागि विभिन्न क्षेत्रमा परिचालन गरिएको हो।

बाढीले बगाएर ल्याएका शव भेटिने क्रम दिनभर अझ बढ्न सक्ने अनुमान गरिएको प्रमुख जिल्ला अधिकारी उपाध्यायले बताउनुभएको छ। सम्भावित जोखिमलाई ध्यानमा राख्दै बिहानैदेखि सुरक्षा निकाय परिचालन गरी नदी किनार तथा भङ्गालामा खोजी तीव्र पारिएको छ।

स्थानीय प्रशासनले शव व्यवस्थापनलाई अहिले सबैभन्दा चुनौतीपूर्ण कामका रूपमा लिएको छ। गैँडाकोट, देवचुली, कावासोती र मध्यविन्दुका चारवटै नगरपालिकामा १०–१० वटा शव राख्न सकिने गरी व्यवस्थापनको तयारी गरिएको छ।

प्रहरी उपरीक्षक खड्काले शव व्यवस्थापन जटिल हुने देखिएकाले यस विषयमा आवश्यक निर्णयका लागि बैठक भइरहेको बताउनुभयो।

‘सबैभन्दा जटिल काम शव व्यवस्थापन हुने देखिएको छ। त्यसका लागि अहिले हामी बैठक बस्दै छौँ,’ उहाँले भन्नुभयो।

प्रहरीले नदी किनार तथा आसपासका क्षेत्रमा थप शव वा मानव अंग फेला परे तत्काल प्रहरीलाई खबर गर्न स्थानीयवासीलाई अनुरोध गरेको छ।

Originally published on abcnews.com.np.