काठमाडौं । नेपाल–चीन सीमावर्ती रसुवागढी–केरुङ क्षेत्रमा भदौ १० गते आएको विनाशकारी बाढीपहिरोको घटनाबारे काठमाडौंस्थित चिनियाँ दूतावासले स्पष्टीकरण जारी गर्दै चीनले पूर्वसूचना नदिँदा नेपालतर्फ क्षति भएको भन्ने दाबी तथ्यहीन रहेको जनाएको छ।

दूतावासले विज्ञप्तिमार्फत चिनियाँ भूभागमा बनेको कुनै भौगर्भिक बाँध भत्किँदा नेपालतर्फ ठूलो क्षति पुगेको भन्ने समाचारसमेत निराधार रहेको दाबी गरेको छ।

दूतावासका अनुसार सन् २०२६ अगस्ट २६ को बिहान नेपालतर्फको भूभागमा भूकम्प वा त्यससँग मिल्दोजुल्दो हिमनदी अथवा हिम–चट्टान भत्कने प्रकृतिको घटना भएको थियो। उक्त प्राकृतिक घटनापछि ठूलो मात्रामा लेदो, ढुङ्गा र गेग्रानसहितको पहिरो तथा बाढी आएको दूतावासको भनाइ छ।

नेपाल र चीन दुवैतर्फ मानवीय क्षति

चिनियाँ दूतावासले उक्त प्राकृतिक विपद्बाट नेपालतर्फ मात्र नभई चीनको ग्याइरोङ क्षेत्रसमेत प्रभावित भएको जनाएको छ। घटनामा दुवैतर्फ मानवीय तथा भौतिक क्षति भएको र केही मानिस बेपत्ता भएको उल्लेख गरिएको छ।

दूतावासले घटनाको वास्तविक कारणबारे वैज्ञानिक तथा प्राविधिक मूल्याङ्कन आवश्यक रहेको जनाउँदै विपद्को समयमा आरोप–प्रत्यारोपमा केन्द्रित हुनुभन्दा उद्धार, राहत र प्रभावित नागरिकको जीवनरक्षाका लागि सहकार्य गर्नुपर्नेमा जोड दिएको छ।

‘आरोप–प्रत्यारोप होइन, सहकार्य आवश्यक’

विज्ञप्तिमा नेपाल र चीन दुवै देश प्राकृतिक विपत्तिबाट प्रभावित भएकाले यस कठिन परिस्थितिमा एकअर्कामाथि आरोप लगाउनुभन्दा द्विपक्षीय समन्वय र सहकार्यलाई प्राथमिकता दिनुपर्ने उल्लेख गरिएको छ।

दूतावासले सीमापार प्राकृतिक विपद्को प्रभाव सामना गर्न दुवै देशका सम्बन्धित निकायबीच सूचना आदानप्रदान, वैज्ञानिक अनुसन्धान, उद्धार तथा राहत कार्यमा समन्वय आवश्यक रहेको जनाएको छ।

रसुवागढी–केरुङ क्षेत्रको पछिल्लो विपत्तिको कारणबारे विभिन्न वैज्ञानिक तथा प्राविधिक अध्ययन भइरहेका बेला चिनियाँ दूतावासले आफ्नो धारणा सार्वजनिक गर्दै बाढीको कारण, पूर्वसूचना र सीमापार प्रभावसम्बन्धी फैलिएका केही दाबीलाई अस्वीकार गरेको हो।

Originally published on abcnews.com.np.