काठमाडौँ । रसुवा जिल्लामा आएको भीषण बाढीका कारण जलविद्युत् आयोजनामा कार्यरत १९६ भन्दा बढी कर्मचारी तथा कामदार सम्पर्कविहीन भएका छन्। नेपाल विद्युत् प्राधिकरणका अनुसार सम्पर्कविहीन हुनेमा केही विदेशी नागरिकसमेत रहेका छन्।

प्राधिकरणका अनुसार निर्माणाधीन त्रिशूली–३ बी आयोजनाको साइटमा कार्यरत २१ जना कर्मचारी सम्पर्कविहीन छन्। यस्तै, चिलिमे जलविद्युत् केन्द्रको पावर हाउस क्षेत्रमा ६ जना तथा आवास क्षेत्रनजिक १ जना सम्पर्कबाहिर छन्।

चिलिमे जलविद्युत् कम्पनीअन्तर्गत चेस्को कम्पनीका ११ जना कर्मचारी पनि त्रिशूली–३ बीको साइटमा काम गरिरहेका अवस्थामा सम्पर्कविहीन भएका छन्। रसुवागढी जलविद्युत् केन्द्रमा कार्यरत ५१ जना सम्पर्कमा आएको जानकारी प्राप्त भए पनि बाँकी कर्मचारीको अवस्था अझै यकिन हुन सकेको छैन।

यस्तै, त्रिशूली–३ ए जलविद्युत् केन्द्रको पावर हाउसमा मर्मतसम्भारमा खटिएका ४५ जना कर्मचारी तथा कामदार पनि सम्पर्कविहीन छन्।

प्राधिकरणका त्रिशूली र देवीघाट जलविद्युत् केन्द्रमा कार्यरत एक–एक जना कर्मचारी पनि सम्पर्कबाहिर छन्। रसुवा वितरण केन्द्रअन्तर्गत चिलिमे पावर हाउसको स्विचयार्डमा कार्यरत एक कर्मचारी र गोटागन्तीका मिटर रिडरसँग पनि सम्पर्क हुन सकेको छैन।

त्यसैगरी, त्रिशूली २२० केभी ३ बी हबमा कन्ट्र्याक्टरतर्फबाट कार्यरत १६ जना तथा रसुवागढी जलविद्युत् केन्द्रमा विभिन्न कन्ट्र्याक्टरमार्फत मर्मतसम्भार र निर्माण कार्यमा खटिएका ९२ जना पनि सम्पर्कविहीन रहेको प्राधिकरणले जनाएको छ।

उद्धार टोली परिचालन

कर्मचारी तथा कामदार सम्पर्कविहीन भएपछि नेपाल विद्युत् प्राधिकरणका निमित्त कार्यकारी निर्देशक दीर्घायु श्रेष्ठको नेतृत्वमा टोली प्रभावित क्षेत्रमा पुगेको छ। टोलीले प्रभावित क्षेत्रको अनुगमन गर्नुका साथै हराइरहेकाहरूको खोजी तथा उद्धारका लागि प्राधिकरणका कर्मचारी परिचालन गरेको छ।

जोखिममा रहेका कर्मचारी तथा सर्वसाधारणलाई सुरक्षित स्थानमा स्थानान्तरण गर्नसमेत अर्को टोली स्थानीय क्षेत्रमा खटाइएको छ।

निमित्त कार्यकारी निर्देशक श्रेष्ठका अनुसार सम्पर्कविहीन कर्मचारी तथा प्रभावित उत्पादन र प्रसारण संरचनासँग सम्पर्क स्थापित गर्ने प्रयास भइरहेको छ। त्यसका लागि स्थानीय प्रशासन, सुरक्षा निकाय, स्थानीय तह, स्वास्थ्य संस्था तथा अन्य सरोकारवाला निकायसँग समन्वय गरी विवरण संकलन तथा खोजी कार्यलाई तीव्रता दिइएको छ।

Originally published on abcnews.com.np.