सिन्धुली, १६ कात्तिक। सिन्धुली जिल्लाकै सर्वोत्कृष्ठ राशी पुरस्कार रहेको मोहन विक्रम थापा स्मृति फुटबल प्रतियोगिता फाइनल खेलमा मिस नेपाल हङकङ सुस्मा लिम्बू आउने भएकी छन् ।

सिन्धुलीको भिमानस्थित जनजागृति विद्यालय प्रांगणमा हुने फुटबल प्रतियोगिताको फाइनल खेलको विशेष अतिथिका रुपमा मिस नेपाल हङकङ लिम्बू आउने भएको हो । सो प्रतियोगिताको फाइनलमा १० हजार जनाभन्दा बढी दर्शकको भीड लाग्ने अनुमान आयोजकको छ ।

आयोजक भिमान युवा क्लबका अनुसार, शनिवार विहान ११ बजेबाट हुने प्रतियोगिताको सम्पूर्ण तयारी पूरा भएको छ ।

फाइनल चरणमा बर्दिबास स्पोर्टस क्लब महोत्तरी र चन्द्रमा क्लब महोत्तरीबीच प्रतिस्पर्धा हुनेछ । भिमान युवा क्लबको आयोजना तथा सिन्धुली ट्रष्टको साझेदारीमा सञ्चालन भएको प्रतियोगितामा उत्साहजनक ढंगबाट कात्तिक ८ गतेबाट सुरुवात भएको थियो ।

प्रतियोगिताको प्रथम पुरस्कार एक लाख ५० हजार रुपियाँसहित शिल्ड, मेडल र प्रमाणपत्र प्रदान गरिने छ । त्यस्तै, दोस्रो पुरस्कार राशी ५० हजार रुपियाँ, शिल्ड, मेडल र प्रमाणपत्र रहेको छ ।

प्रतियोगितामा उत्कृष्ट खेलाडी, अनुशासित टिम र म्यान अफ दी म्याचको अवार्डसमेत रहेको आयोजक क्लवले जनाएको छ । सो प्रतियोगिताको फाइनल खेलमा दर्शकको रुपमा सहभागी हुन काठमाडौं, जनकपुर र सिन्धुलीका विभिन्न स्थानबाट व्यापक सहभागिता रहने स्थिति छ । कार्यक्रमको प्रमुख अतिथिमा सिन्धुली टष्टका अध्यक्ष बरिष्ठ समाजसेवी उज्वल विक्रम थापा रहने छ ।

कार्यक्रममा सिन्धुलीका ख्याती प्राप्त कलाकारहरुले सांगीतिक कार्यक्रम समेत प्रस्तुत गर्नेछन् । कार्यक्रममा विशेष व्यक्तित्वहरुको समेत सहभागिता रहने आयोजकले जनाएको छ ।