पोखरा,२८ मङसिर । पोखरामा आयोजना हुने चौथो राष्ट्रिय पुरुष क्लब लिग भलिबल प्रतियोगिताको सम्पूर्ण तयारी पूरा भएको छ ।

नेपाल भलिबल सँघले पोखरा रङ्गशालाको भलिबल खेल मैदानमा आगामी १ देखी ७ गतेसम्म सञ्चालन गर्ने चौथो राष्ट्रिय पुरुष क्लब लिग भलिबल प्रतियोगिताको सम्पूर्ण तयारी पूरा भएको शुक्रबार पोखरामा आयोजित पत्रकार सम्मेलन मार्फत जानकारी दिईएको हो ।

उक्त प्रतियोगितामा प्रथम हुने टिमले नगद रु २ लाख सहित मेडल, प्रमाणपत्र तथा ट्रफि प्राप्त गर्ने सँघका महासचिब जितेन्द्र बहादुर चन्दले बताएका छन । चन्दका अनुसार द्धित्तीय, तृतीय र चौथों स्थान हासिल गर्ने टिमले प्रमाणपत्र, मेडल तथा ट्रफि सहित क्रमश १ लाख, ५० हजार र २५ हजार हात पार्नेछ ।

त्यसैगरी प्रतियोगिताबाट सर्वाेत्कृष्ट बन्न सफल एक जना खेलाडीले २५ हजार रुपैया प्राप्त गर्नेछ भने,उत्कृष्ट लिब्रो, सरभर, ब्लकर, लिफ्टर, स्पाईकर र टिम प्रशिक्षकले जनही नगद रु ५ हजार रुपैयाबाट पुरस्कृत हुने छन ।

प्रतियोगितामा हेल्प नेपाल स्पोटर्स, नेपाल प्रहरी, एपिएफ, त्रिभुवन आर्मी क्लब, बुटवलको मणिमुकुन्द भलिबल क्लब, जावलाखेल भलिबल ट्रेनिङ सेन्टर, धोरपाटन ट्रेनिङ सेन्टर र नयाँबजार युथ क्लब गरी कुल ८ टिमको सहभागिता रहने आयोजकले जनाएको छ ।