काठमाडौं, ८ असोज । प्रदेश नम्बर दुईको स्थानीय तह निर्वाचन अन्तर्गतको मतपरिणाम आउने क्रम अन्तिम चरणमा पुगेको छ ।
अहिलेसम्को मतपरिणामअनुसार नेपाली कांग्रेसले ३७ स्थानीय तहमा जित हासिल गर्दै पहिलो स्थानमा छ । दोस्रौ स्थानमा राष्ट्रिय जनता पार्टी नेपाल रहेको छ ।

राजपाले २४ स्थानीय तहमा जित हासिल गरेको छ । संघीय समाजवादी फोरम २३ स्थानीय तहमा जित हासिल गर्दै तेस्रो र नेकपा माओवादी केन्द्र २० स्स्थनीय तहमा जित हासिल गर्दै चौथो दल बनेको छ ।

पहिलो र दोस्रो चरणको निर्वाचनमा पहिलो दल बनेको नेकपा एमाले भने तेस्रो चरणको निर्वाचनमा पाँचौ दलमा सीमित भएको छ । अहिलेसम्म एमालेले १७ स्थानीय तहमा मात्र जित हासिल गरेको छ ।

मतपरिणाम अनुसार नेपाली कांग्रेसले २० नगरपालिका, १३ गाउँपालिकामा विजयी हासिल गरेको छ ।

दोस्रो स्थानमा रहेको राष्ट्रिय जनता पार्टी नेपालले ११ नगरपालिका, ११ गाउँपालिका र १ उप–महानगरपालिकामा जित हासिल गर्न सफल भएको छ ।

तेस्रो स्थानमा रहेको संघीय समाजबादी फोरम ७ नगरपालिका, १५ गाउँपालिकामा विजयी भएको छ भने चौथो स्थानमा रहेको नेकपा माओवादी केन्द्रले १० नगरपालिका, १० गाउँपालिकामा जित हासिल गरेको छ ।

पाँचौ स्थानमा रहेको नेकपा एमालेले भने १० नगरपालिका, ६ गाउँपालिका र १ उप–महानगरपालिका सहित १७ स्थानीय तहमा विजयी हासिल गरेको छ ।

तराई क्षेत्र नै आफ्नो मुख्य थलो भएको नेपाल लोकत्रान्त्रिक फोरमले १ नगरपालिका र २ गाउँपालिका मात्र जित हात पारेको छ । यस्तै, नेपाली जनता दलले २ र नयाँ शक्ति नेपालले १ स्थानीय तहमा जित हासिल गरेको छ ।