विराटनगर,१५ चैत । मोरङका एक अधिकृतलाई घुस सहित अख्तियार दुरुपयोग अनुसन्धान आयोगको टोलीले पक्राउ गरेको छ ।

डिभिजन वन कार्यालय सहायक वन अधिकृत सलाउद्दीन अन्सारीलाई विराटनगरबाट ३५ हजार घुससहित आयोगको टोलीले पक्राउ गरेको हो । उनले मोरङको सुन्दर हरैचा नागरपालिकामा रहेको दिपज्योति सामुदायिक वन उपभोक्ता समितिसँग ३५ हजार घुस लिँदै गरेका थिए ।

लाटी झोडा साझेदारी वन समेत हेर्ने जिम्मेवारी पाएका अन्सारीले काठ दाउरा काट्न सहमति दिने नाममा उपभोक्ता समितिबाट रकम मागेका थिए । पटक–पटक उपभोक्ता समितिबाट विभिन्न नाममा रकम लिने गरेको गुनासो आउने गरेको आधारमा अख्तियारको टोलीले पिछा गर्दै उनलाई डिभिजन वन कार्यालयबाटै पक्राउ गरेको हो ।

अख्तियार दुरुपयोग अनुसन्धान आयोगका डीएसपी डिल्लीनारायण पाण्डेको नेतृत्वमा खटिएको टोलीले उनलाई कार्यालयबाट नगदसहित पक्राउ गरेको छ । उनलाई पक्राउपछि कानूनी प्रक्रिया पूरा गरी काठमाडौं पठाउने तयारी भएको छ । अख्तियारका अनुसार शुक्रवारै उनलाई काठमाडौं लगिने बताइएको छ।