वैशाख, २२ काठमाडौं । प्रदेश १ को स्थायी राजधानी विराटनगर नै हुने भएको छ । नेकपा प्रदेश संसदीय दलको आजको बैठकले प्रदेश राजधानी विराटनगरमा राख्ने निर्णय गरेको हो ।

संसदीय दलको निर्णयबारे जानकारी दिदै प्रदेश सरकारका प्रवक्तासमेत रहनुभएका आन्तरिक मामिला तथा कानुनमन्त्री हिक्मत कार्कीले राजधानी बिराटनगर नै रहने निर्णय गरेको बताउनुभयो । ९३ सांसद रहेको यो प्रदेशमा नेकपाका ६७ सांसद् छन् । २ तिहाइ मतले नाम र राजधानी टुंग्याइने संवैधानिक व्यवस्था छ ।

नेकपाको यो संख्या निर्णय गर्नका लागि पर्याप्त छ । संसदीय दलको बैठकमा कार्यपालिका, व्यवस्थापिका लगायतका संरचना इटहरी, विराटनगर, सुन्दरहरैंचा आसपासमा संरचना निर्माण गर्ने निर्णय भएको छ । प्रस्ताव पेश गर्न आज ५ बजेसम्मको समय दिइएको थियो । आजसम्म छलफल गर्ने भन्दै गत बिहीबार संसदको बैठक सूचना टा“सेर स्थगित भएको थियो ।

धनकुटालाई राजधानी बनाइनुपर्छ भन्दै आएका नेकपाका ४ सांसदहरुले संसदीय दलको बैठकमा ‘नोट अफ डिसेन्ट’ लेखेको धनकुटाको ‘ख’ प्रदेशबाट निर्वाचित सांसद इन्द्रमणी पराजुलीले बताउनुभयो । धनकुटामा नेकपाका ४ सांसद छन् ।

नेपाली कांग्रेसका संसदीय दलका नेता केदार कार्कीले कांग्रेसले पनि बिराटनगर नै राजधानी राख्ने प्रस्ताव दर्ता गरेको बताउनुभयो । कांग्रेसलाई संघीय समाजबादी फोरम नेपालले पनि समर्थन गरेको छ । धनकुटाका नेपाली कांग्रेस र संघीय समाजबादी फोरम नेपालका सांसदले धनकुटालाई नै राजधानी बनाइनुपर्छ भन्ने छुट्टै प्रस्ताव दर्ता गराएका छन् । संसदको अर्को बैठक नबोलाइएकाले यो निर्णय कहिलेसम्म हुन्छ भन्ने टुंगो छैन ।

संसदको बैठक बसेको झण्डै १४ महिनापछि मात्र राजधानीको प्रस्ताव दर्ता भएको हो । नामको भने अझै टुंगो छैन । ७ वटा प्रदेशमध्ये अझै १, २, ३ र ५ नम्बरले नाम र राजधानीको टुंगो लगाएका छैनन् । कति समयमा टुंग्याउने भन्ने संवैधानिक व्यवस्था नभएकाले प्रदेशहरुले यो विषयलाई महत्व दिएका छैनन् । सबैभन्दा पहिले ६ नम्बर प्रदेशले नाम र राजधानी टुंग्याएको थियो ।