काठमााडौं,२५ बैशाख । गण्डकी प्रदेशको भूमि, व्यवस्था, कृषि तथा सहकारी मन्त्रालयले ‘एक गाउँ एक पशु सेवा प्राविधिक’ लाई सेवा सञ्चालनका लागि उपकरण प्रदान गरेको छ । पशुपालक कृषकको घरदैलोमा पुगेर सेवा दिने उद्देश्यले मन्त्रालयले तनहुँ र नवलपुरका पशु सेवा प्राविधिकलाई विभिन्न उपकरण प्रदान गरेको हो । पशुपक्षी रोग अन्वेषण प्रयोगशाला पोखराले मङ्गलबार दमौलीमा एक कार्यक्रमको आयोजना गरी ३४ पशु सेवा प्राविधिकलाई विभिन्न सात उपकरण प्रदान गरेको छ ।

उपकरण पाउनेमध्ये तनहुँका २० र नवलपुरका १५ पशु सेवा प्राविधिक रहेको प्रयोगशालाका प्रशिक्षक डा गणेश केसीले जानकारी दिनुभयो । उहाँका अनुसार पशु सेवा प्राविधिकलाई माइक्रोस्कोप, सर्जिकल सेट, खसी पार्ने उपकरण, सेन्टीफ्युजलगायतका उपकरण प्रदान गरिएको छ । माइक्रोस्कोप भने तनहुँमा चार र नवलपुरमा दुई मात्रै प्रदान गरिएको उहाँले जानकारी दिनुभयो । पशु सेवा प्राविधिकलाई करीब रु १४ लाखको उपकरण प्रदान गरिएको छ । पशु सेवा विभागमार्फत गत वर्ष नै वितरण गर्नुपर्ने ती उपकरण प्राविधिक कारणले वितरणमा ढिलाइ भएको थियो । उपकरण पाएसँगै कृषकको घरघरमै पुगेर सेवा दिन सहज हुने पशु सेवा प्राविधिक धनराज कुमालले बताउनुभयो ।

उहाँले भन्नुभयो, “उपकरणको अभावमा सेवा प्रवाहमा असहजता उत्पन्न भएको थियो, अब भने सहज हुने भएको छ ।” पशु सेवा प्राविधिकलाई उपकरण प्रदान गर्दै गण्डकी प्रदेशका भूमि, व्यवस्था, कृषि तथा सहकारीमन्त्री लेखबहादुर थापाले कृषि र पशुपालनमा प्रदेशलाई आत्मनिर्भर बनाउन पशु प्राविधिकको महत्वपूर्ण भूमिका रहने बताउनुभयो । उहाँले समयमै उपचार नपाउँदा पशुको मृत्युसमेत हुनसक्ने भएकाले पशु प्राविधिक त्यसप्रति बढी संवेदनशील हुनुपर्नेमा जोड दिनुभयो । मन्त्री थापाले कृषिमा श्रमप्रतिको विश्वास जगाउन आवश्यक रहेकामा जोड दिँदै कृषकलाई काम गर्ने वातावरण सिर्जना गर्न प्रदेश सरकार सदैव क्रियाशील रहेको प्रतिबद्धता जनाउनुभयो ।

युवापुस्तालाई कृषिमा आकर्षण गर्नका लागि नीति बनाउन सरकार लागिपरेको बताउँदै उहाँले कृषिलाई सम्मानित पेशा बनाइने बताउनुभयो । व्यास नगर साइनिङ स्टार हुने जेसीआई व्यास नगरको आयोजनामा व्यास नगर साइनिङ स्टारको साताँै संस्करण हुने भएको छ । बालबालिकाको अन्तरनिहीत प्रतिभा प्रष्फुटन गर्ने उद्देश्यसहित जेसीआई व्यास नगरले यस वर्षसमेत साइनिङ स्टार आयोजना गर्न लागेको हो । जेसीआईले सन् २०१७ देखि प्रत्येक वर्ष साइनिङ स्टार गर्दै आएको छ । बालबालिकामा रहेको प्रतिभा प्रष्फुटन गर्दै उनीहरुको नेतृत्व विकास गर्ने उद्देश्यसहित कार्यक्रम आयोजना गर्न लागिएको जेसीआई व्यास नगरका कार्यकारिणी उपाध्यक्ष एवं साइनिङ स्टारका मूल संयोजक कृष्ण सुनारले जानकारी दिनुभयो ।

कार्यक्रमको अडिसन राउण्ड जेठ ३ र ४ गते हुँदैछ । अडिसन राउण्डमा १०० भन्दा बढी बालबालिकाको सहभागिता रहने अनुमान गरिएको जेसीआई व्यास नगरका अध्यक्ष रमेश गिरीले बताउनुभयो । उहाँका अनुसार अडिसन राउण्डबाट छनोट भएका बालबालिकालाई एक महीनाको अवधिसम्म नेतृत्व विकास, अनुशासन, पर्यटन, बालअधिकारलगायतमा प्रशिक्षण दिइनेछ । साइनिङ स्टारको फाइनल आगामी असार १४ गते हुनेछ । १० देखि १४ वर्षसम्मका बालबालिकाले प्रतियोगितामा भाग लिन पाउनेछन् । प्रतियोगिताको विजेताले नगद रु २५ हजार, फस्ट रनरअपले रु १५ हजार र सेकेण्ड रनरअपले रु १० हजार नगदसहित आकर्षक पुरस्कार प्राप्त गर्ने आयोजकले जानकारी दिएको छ । प्रतियोगितामा विभिन्न १३ विधामा बालबालिकालाई पुरस्कृत गरिनेछ ।