काठमाडौ,१३ जेठ । नेपाल कम्युनिष्ट पार्टी (विप्लव) पार्टीले आब्हान गरेको नेपाल बन्दका कारण आज बिहानै देखि पुर्वमा जनजीवन प्रभावित भएको छ ।

लामो तथा छोटो दुरीका सवारी साधन चल्न सकेका छैनन भने बन्दका कारण जनमानसमा अन्यौलता सिर्जना भएको छ । धरान देखि लामो तथा छोटो दुरीमा चल्ने सवारी साधन कुनै पनि चलेका छैनन् ।

बन्दको क्रममा धरान विराटनगर सडक खण्डको तरहराको पानीपिया देखि केही मास्तिर शंकाष्पद बस्तु राखिएको थियो । दुईवटा झोलामा राखिएको सो वस्तुलाई नेपाली सेना बम डिस्पोजल टोलीले डिस्पोज गरिसकेको इलाका प्रहरी कार्यालय इटहरीका प्रमुख डिएसपी समिरचन्द्र खरेलले जानकारी दिनुभयो । यसैविच उता मोरङका बिभिन्न स्थानमा शंकास्पद बस्तुहरु फेला परेका छन् ।

विराटनगर र बुढीगांगा गाउँपालिकाको बिचमा पर्ने बुढीगंगा गाउँपालिका १ पहाडगछ मार्गमा शंकास्पद बस्तु फेला परेको हो । बिहान प्रेसर कुकर जस्तो देखिने बस्तु स्थानीयले देखेर प्रहरीलाई खबर गरेका थिए । प्रहरीलाई खबर गरिए लगत्तै पुगेको प्रहरीको टोलीले बम भएको हुनसक्ने आशंकामा नेपाली सेनाको बम डिस्पोजल टोलीलाई खबर गरिएको जिल्ला प्रहरी कार्यालय मोरङका डिएसपी घनश्याम श्रेष्ठले जानकारी दिनुभयो ।

त्यस्तै मोरङको सुन्दरहरैंचा–७ ढडियास्थित पुर्व–पश्चिम राजमार्गको किनारामा पनि कुकर बम भेटिएको छ । राजमार्ग छेउमा रहेको बिजुलीको पोल नजिकै सो बम फेला परेको हो । बम भेटिएको स्थानलाई सुरक्षाकर्मीले घेरा हालेर राखेको छ । रातो तारले कुकरलाई बेरेर राखिएको अवस्थामा फेला परेको हो ।

उक्त कुकरभित्र बिस्फोटक पदार्थ भए नभएको यकिन हुन सकेको छैन । बम कसले राखेको हो भन्ने नखुले पनि आज विप्लव माओवादीले बन्द आह्वान गरेकोले बम पनि सोही समुहले राखेको हुनसक्ने प्रहरीले अनुमान गरेको छ ।यसरी पुर्वका विभिन्न ठाउमा शंकास्पद वस्तु राखे पछि पुर्वमा पनि जनमानसमा त्रास फैलिएको छ ।