काठमाडौं, २९ जेठ ।  शमी साहित्य प्रतिष्ठानले संस्थाले साहित्यिक मासिक पत्रिका प्रकाशन गर्ने तयारी गरेको छ ।

नेपाली भाषा, साहित्य, कला, संस्कृति र लोकसाहित्यको खोज अनुसन्धान एवं तिनीहरुको समीचिन संरक्षण, सम्वद्र्धन र उन्नयन गर्ने उद्देश्यका साथ विसं २०७१ मा स्थापित सो संस्थाले आगामी साउन महीनादेखि मौलिक रुपरेखासहित ‘शमी’ साहित्यिक मासिक पत्रिकाको प्रकाशन प्रारम्भ गर्ने निर्णय गरेको हो ।

पत्रिकाको पहिलो अङ्कमा नेपाली साहित्यका विशिष्ट धरोहर शताब्दी वाङ्यमय पुरुष सत्यमोहन जोशी र राष्ट्रकवि माधवप्रसाद घिमिरेकोे १०० वर्ष प्रवेशका सन्दर्भमा उहाँहरुको योगदानबारे विशेष सामग्री समावेश गरिनेछ । यस पत्रिकाको सम्पादकमा गोरखापत्र दैनिकका पूर्वप्रबन्धसम्पादक लक्ष्मीधर गुरागाईं रहनुहुनेछ ।

संस्थाले आगामी असोज ५ गते वितरण हुने गरी रु एक लाख ११ हजार ११ राशिको ‘बादलभित्रको घाम नेपाली साहित्य पुरस्कार’ र रु २५ हजार राशिको ‘शमी पाठक पुरस्कार’ घोषणा गरिसकेको छ । ‘बादलभित्रको घाम’ संस्थाका संरक्षक डोलिन्द्रप्रसाद शर्माको पहिलो निबन्ध कृति हो ।

सातै प्रदेशका कार्यालय खोल्ने तयारी गरेको प्रतिष्ठानले नयाँ कोष खडा गरी सुविधासम्पन्न स्रष्टा गाउँको निर्माण गर्ने दीर्घकालीन लक्ष्य पनि सार्वजनिक गरेको छ ।