अछाम , २९ जेठ । अछाममा जंगली जनावरको आक्रमणबाट दुई जना घाईते भएका छन् । जिल्लाको साँफेबगर नगरपालिका वडा नम्बर १३ बाब्लाका ६१ बर्सिय धुलु सुनार भालुको आक्रमणबाट घाइते भएका छन् । बुधबार विहान बाब्लाको ओला जाने क्रममा गोडा खोला भन्ने जङ्गलमा भालुले आक्रमण गरेको थियोे ।

भौगोलिक रूपमा बिकटका साथै घना जङ्गल भएकोले घाइतेलाई घटना स्थल बाट दुई घण्टाको बाटो हिडेर बाब्ला पुर्याइएको थियो । घाइते सुनारको अनुहारमा गहिरो चोट लागेको छ । सुनारको अहिले न्याय हेल्थ बयलपाटामा उपचार भइरहेको छ ।

यस्तै अछामको कमलबजार नगरपालिका वडा नम्बर ६ गैरिटाड निवासी ३८ बर्सिय शेर बहादुर शाही पनि मंगलबार दिउँसो बाघको आक्रमणबाट घाइते भएका छन् । पाचुली भन्ने जङ्गलमा बाख्रा चराउन गएको बेला शाही लाई बाघले आक्रमण गरेको थियो । घाइते शाहिको जिल्ला अस्पताल अछाममा उपचार भइरहेको छ । शाहिको टाउको, दाहिने गाला र खुट्टामा चोट लागेको छ ।