पोखरा, १९ असार । गण्डकी प्रदेश सभाका स्वतन्त्र सांसद राजीव गुरुङ ( दीपक मनाङे) बिहीबार नेपाल कम्युनिस्ट पार्टी प्रवेशगर्नुभएको  छ। गण्डकी प्रदेशका मुख्यमन्त्री तथा प्रदेश इन्चार्ज पृथ्वीसुब्बा गुरुङले राजीवलाई स्वागत गर्नुभएको हो ।

स्वतन्त्र सांसद राजीवको प्रवेशसँगै गण्डकी प्रदेश सभामा नेकपाको दुईतिहाई बहुमत पुगेको छ । ६० सदस्यीय प्रदेशसभामा अब नेकपाको संख्या ४० पुगेको छ । तत्कालीन एमालेका २७ र माओवादीले १२ सदस्य गरी संसदमा ३९ सदस्यीय बहुमतमा नेकपा थियो ।

गण्डकी प्रदेशमा कांग्रेस १५, जनमोर्चा ३ र नयाँ शक्तिको २ सिट छ । जनमोर्चाका सांसद टेकबहादुर घर्तीको निधन भएपछि उपनिर्वाचन नहुँदासम्म एक सिट रिक्त छ । मनाङको प्रदेशसभा ख बाट निर्वाचित राजीव नेकपामा प्रवेश गरेपछि दुईतिहाई बहुमतको बनेको हो । मनाङ प्रदेश सभा ख तत्कालीन एमालेको भागमा परेको थियो । अन्तिममा आएर उम्मेदवारी फिर्ता लिँदै राजीवलाई नै एमालेले समर्थन गरेपछि उहा स्वतन्त्र सांसदको रुपमा निर्वाचित हुनुभएको थियो ।

सासंद राजीवसँगै बिहीबार विप्लव नेतृत्व नेकपाका कास्की सचिवालय सदस्य तथा माछापुच्छ्रे इन्चार्ज पुष्प कार्की पनि नेकपा प्रवेश गर्नुभएको छ । उहाँ ५२ सालदेखि भूमिगत जीवन बाँचेको र अहिले पार्टी प्रतिवन्धको अवस्था पनि नेकपामै रहेको बताउँदै अब नेकपाले नै विकास गर्ने बताएकाले प्रवेश गरेको बताउनुभयो ।

मन्तव्यको क्रममा मुख्यमन्त्री गुरुङले विप्लव समूहका सबै व्यक्तिलाई नेकपामा आउन समेत आह्वान गर्नुभयो । ‘कुन्ठाको आधारमा आतंक फैलाउने काम राम्रो होइन, सबै विप्लव समूहका व्यक्तिलाई नेकपा प्रवेश गर्न अनुरोध गर्छु,’ उहँले भन्नुभयो। ‘सुखी नेपाली र समृद्ध नेपालका लागि अर्को विकल्प छैन ।’