धनुषा २० असोज । धनुषाको नगराइन नगरपालिकाको नगरसभा विवादित बनेको छ । मेयर प्रमेश्वर यादबले काँग्रेस उपसभापति बिमलेन्द्र निधीका बुवा स्वर्गिय महेन्द्र नारायण निधीको नामबाट नगरपालिकाको नामाकरण गर्ने प्रस्ताव गरेपछि नगरसभा विवादित बनेको हो ।

विवादका कारण असार १० गते नै सुरु भएको नगरसभा अझै सम्पन्न हुन सकेका छैन । आज विहान ११ बजे नगरसभाको अन्तिम बैठक बोलाएको थियो । तर नगरपालिकाको नाम परिवर्तन गर्न बहुमत नपुग्दा फेरी स्थगित भएको छ । अब अर्को बैठक असार २४ गते गर्ने निर्णय गरिएको मेयर यादबले जानकारी दिए ।नेपाली काँग्रेसबाट निर्वाचित मेयर यादबले नगरपालिकाको नाम परिवर्तन गर्ने विषय गम्भिर रहेकाले छलफल गरी मात्र निर्णय लिने भनेर बैठक सारेको बताए । तर नेकपा र समाजवादी पार्टीबाट निर्वाचित जनप्रतिनिधिहरुले बहुमत नपुग्दा बैठक सारेको बताउँछन् । वडा ८ का अध्यक्ष संजय राउतले जनप्रतिनिधिलाई खरिद गर्ने प्रयास गरेको र असफल भएपछि बैठक सारेको आरोप लगाए ।

नगरपालिकाको नाम परिवर्तन गर्न दुई तिहाइ बहुमत चाहिन्छ । यस नगरपालिकामा कुल ५९ कार्यपालिका सदस्य छन् । जसमध्ये करिब ३४ जना भएपछि मात्र नाम परिवर्तन हुन्छ । तर काँग्रेसको मात्र २९ जना छन् । नाम परिवर्तनका लागि ५ जना थप चाहिन्छ । ति ५ जना नेकपा र समाजवादी पार्टीका जनप्रतिनिधि सहमती नभए प्रस्ताव पास हुँदैन ।

मेयर यादबले आफूसँग बहुमत रहेको दावी गरे । काँग्रेसबाट निर्वाचित मात्र २९ जना छन् नी भन्ने जिज्ञासामा उनले केहि बोल्न चाहेन । उनले प्रजातन्त्रका लागि महेन्द्र नारायण निधीको ठूलो योगदान रहेको र एउटा विभुती नै भएकोले सम्मानका लागि उनको नामबाट नगरपालिकाको राख्न चाहेको बताए । यता, नेकपा र समाजवादी पार्टीका जनप्रतिनिधहरुले शहिद दुर्गानन्द झा वा अन्य शहिदको नामबाट नगरपालिकाको नामाकरण गर्दा मात्र सहमती जनाउने बताउँछन् । महेन्द्र नारायण निधीको नामबाट नगरपालिकाको नामाकरण गर्दा कुनै पनि हालतमा स्वीकार नगर्ने र आन्दोलनमा उत्रने चेतावनी उनीहरुको छ ।

गत वर्ष पनि मेयर यादबले नगरपालिकाको नाम महेन्द्र नारायण निधी राख्ने प्रयास गर्दा नगरपालिकाको कामकाज ४ महिना अवरुद्ध पारिएको थियो ।