बाँके , २८ असार । लगातारको वर्षाले बाँकेमा राप्ती नदीमा पानीको सतह ‘डेन्जरजोन’ नजिक पुगेको छ । बिहान सामान्य रहेको पानीको सतह दिउँसो एक्कासी बढेको छ ।

राप्ती नदीको कुुसुमस्थित मापद केन्द्रका गेजरिडर भद्रबहादुर थापाले सवा दुई बजे नदीको सतह ५ मिटर २८ सेन्टीमिटर पुगेको छ । ५ मिटर ४० सेन्टीमिटरलाई ‘खतरा’ मानिन्छ । गेजरिडर थापाका अनुसार, पानीको सतह बढ्ने क्रम जारी रहेको छ । बिहान ६ बजे एक मिटर ९० सेन्टीमिटर रहेकोमा सवा दुई बजेसम्ममा ५.२८ मिटर पुगेको हो । यही गतिले पानीको सतह बढेमा अबको केही घण्टामा डेन्जरजोनमा पुगिसक्ने गेजरिडर थापाले जानकारी दिए ।

जिल्ला आपतकालिन कार्य सञ्चालन केन्द्रका प्रमुख गौरी बुढाथोकीले नदीको सतह बढिरहेकाले साइरन बजाउने तयारीमा रहेको जानकारी दिए । ‘प्रमुख जिल्ला अधिकारीसँग कुराकानी भएको छ । केही समयमा हेर्ने र पानीको सतह बढ्दै गएकामा तटीय क्षेत्रमा साइरन बजाउँछौं, बुढाथोकीले भने, साइरन बजेपछि तटीय क्षेत्रका बासिन्दा उच्च ठाउँमा गएर बस्नुपर्छ ।’ नदी मापन केन्द्र रहेको कुसुमबाट होलियासम्म पानी आउन केही घण्टा लाग्छ ।