रुपेन्देही, २९ असार । बुटवल–पाल्पा सडकखण्डको सिद्धबाबा नजिकै पहिरो गई अवरुद्ध बनेको सडक २० घण्टापछि एकतर्फी रुपमा सञ्चालनमा आएको छ ।

शनिबार दिउँसो पहिरो गएर अवरुद्ध बनेको सडक पहिरो हटाइएपछि सञ्चालनमा आएको प्रदेश ट्राफिक प्रहरी कार्यालय बुटवलले जनाएको छ ।

भिरबाट ढुङ्गा खस्नेक्रम नरोकिएका कारण शनिबार साँझसम्म पनि पहिरो हटाउन सकिएको थिएन । आज बिहानैदेखि डोजर लगाएर पहिरो हटाएपछि रोकिएका सवारी साधन सञ्चालनमा आएको प्रदेश ट्राफिक प्रहरी कार्यालयका प्रवक्ता प्रहरी नायब उपरीक्षक रामप्रकाश शाहले जानकारी दिनुभयो ।

शनिबार दिउँसो सिद्धबाबा नजिकै सडकमा गुडिरहेको मोटरसाइकलमाथि पहिरो खस्दा गम्भिर घाइते भएका धनबहादुर सुनारिको मृत्यु भएको थियो । दुर्घटनामा परि गम्भिर घाइते भएका पाल्पाको मित्याल गाउपालिका निबासि ३१ बर्षीय सुनारीको उपचारका क्रममा लुम्बिनी प्रादेशिक अस्पतालमा मृत्यु भएको थियो ।