काठमाडौं, १० साउन । आइसिसी टी–२० विश्वकप एसिया छनोट प्रतियोगिताबाट मलेसिया र कतार अन्तिम खेलअघि नै बाहिरिएका छन् ।

शुक्रबार आयोजक सिंगापुरले मलेसियामाथि ८ विकेटको जित निकालेसँगै मलेसिया र कतार बाहिरिएका हुन्। पहिले ब्याटिङ गरेको मलेसिया ९२ रनमा अलआउट भयो। सिंगापुरले ४० बल खेल्न बाँकी छदा २ विकेटको क्षतिमा लक्ष्य पार ग¥यो। जितसँगै सिंगापुर ३ खेलबाट ५ अंक जोडेर अंक तालिकाको शीर्ष स्थानमा उक्लिएको छ। अब शीर्ष स्थानको सिंगापुरसँगै ३ अंक जोडेर दोस्रो स्थानमा रहेको कुवेत र २ अंक जोडेर तेस्रो स्थानमा रहेको नेपाल मध्ये एक टिम विश्व छनोटमा पुग्नेछन् । नेपाललाई विश्व छनोटमा पुग्न बाँकी रहेका दुवै खेलमा अंक जोड्नु पर्ने समिकरण छ ।

नेपालले शनिबार कुवेत र आइतबार सिंगापुरसँग खेल्नेछ । नेपाल दुवै खेलमा जित हात पारे च्याम्पियन बनेर विश्व छनोटमा पुग्नेछ । शनिबारको खेल वर्षाले अवरुद्ध भएमा पनि नेपालको सम्भावना हुनेछ । यद्यपी शनिबार कुवेतसँग पराजित भएमा भने नेपाल अन्तिम खेलअघि नै बाहिरिनेछ । कुवेतसँग नहारेको नेपालले अन्तिम खेलमा सिंगापुरलाई भने हराउनै पर्नेछ । सिंगापुरसँग पराजित भएमा वा खेल वर्षाले अवरुद्ध भएमा नेपाल बाहिनेछ ।

सिंगापुरले विश्व छनोटमा स्थान बनाउन अन्तिम खेलमा नेपाललाई हराउनु पर्नेछ वा खेल वर्षाले अवरुद्ध हुनु पर्नेछ । कुवेतका लागि पनि विश्व छनोटमा पुग्न नेपाललाई हराउनु पर्नेछ भने अन्तिम खेलमा नेपालले सिंगापुरलाई भारी अन्तरले हराउनु पर्नेछ ।