काठमाण्डौं, २९ कार्तिक । डेनमार्क आउँदो वर्ष रुसमा हुने विश्वकप फुटबलमा स्थान बनाउन सफल भएको छ ।

युरोपियन क्षेत्रको छनौट अन्तर्गत प्ले–अफको दोस्रो लेगमा रिपब्लिक अफ आयरल्याण्डलाई ५–१ ले हराउँदै डेनमार्कले विश्वकपमा स्थान सुरक्षित गरेको हो । पहिलो लेगमा गोलरहित बराबरी खेलेर छनौटको सम्भावना बराबरी राखेको रिपब्लिक अफ आयरल्याण्डले दोस्रो लेगको सुरुको छैटौं मिनेटमा नै गोल गर्दै सुरुवाति अग्रता लिएको थियो । छटौं मिनेटमा शेन डफीले गोल गर्दै घरेलु टोली आयरल्याण्डलाई सुरुवाति अग्रता दिलाएका हुन् । तर त्यसपछि भने डेनमार्कले गोलको वर्षा नै र्गयो । २० औं मिनेटमा आयरल्याण्डका साइरस क्रिष्टिले आत्मघाती गोल गरे । ३२ औं मिनेटमा व्यक्तिगत पहिलो गोल गरेका डेनमार्कका क्रिष्टियन एरिक्सनले ६३ र ७३ औं मिनेटमा थप दुई गोल गर्दै ह्याट्रिक पूरा गरेपछि डेनमार्कले ४–१ को अग्रता लियो । ९० औं मिनेटमा पाएको पेनाल्टीको अवसरलाई सदुपयोग गर्दै निकलस बेन्टनरले गोल गरेपछि डेनमार्क ५–१ ले विजयी भयो र युरोपियन क्षेत्रबाट विश्वकपका लागि बाँकी रहेको एक स्थानमा आफूलाई राख्न सफल भयो । यसअघि ब्राजिलमा सन् २०१४ मा भएको विश्वकपमा छनौट हुन नसकेको डेनमार्कले आउँदो वर्ष रुसमा हुने विश्वकपमा खेल्ने पक्का भएको छ ।