काठमाडौं ९ असार । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत सहमहामन्त्री पदका लागि सांसदद्वय रमेश प्रसाईं र यज्ञमणि न्यौपानेले उम्मेदवारी दिने घोषणा गरेका छन्। दुवैले सहमहामन्त्री पदमा आफ्नो आकांक्षा रहेको जनाउँदै निर्वाचनमा प्रतिस्पर्धा गर्ने बताएका हुन्।

चितवनको भरतपुरमा जारी महाधिवेशनअन्तर्गत आज दिउँसो बन्द सत्र सुरु हुने कार्यक्रम छ। बन्द सत्र सम्पन्न भएपछि निर्वाचन प्रक्रिया अघि बढाइने र पहिलो चरणमा सभापति तथा ९९ जना केन्द्रीय सदस्यका लागि मतदान हुने जनाइएको छ। केन्द्रीय सदस्यको निर्वाचन सम्पन्न भएपछि मात्र पदाधिकारी पदका लागि निर्वाचन गरिनेछ।

रास्वपाको विधानअनुसार पार्टीमा पाँच जना सहमहामन्त्री रहने व्यवस्था छ। तीमध्ये तीन जना निर्वाचनबाट चयन हुनेछन् भने दुई जना सहमहामन्त्री मनोनीत गर्ने व्यवस्था रहेको छ। महाधिवेशनमा नेतृत्व चयनको प्रतिस्पर्धा रोचक बन्दै जाँदा सहमहामन्त्री पदमा पनि आकांक्षीहरूको संख्या बढ्न थालेको छ।